Aizawl September 11, 2023: Naupang Kum tling lo mawihnai lo taka pholanna video thehdarh a nih chungchangah Mizoram State Commission for Protection of Child Rights (MSCPCR) thuchhuah an siam a, an ngai thutak hle.

Tunhnaia Internet Social Media hmanga naupang kum tling lo video mawi lo tak thehdarh a ni chu Mizoram State Commission for Protection of Child Rights (MSCPCR) chuan pawi a ti a. He video thehdarhtute Dan anga hrem an nih ngei theih nan Commission chuan a theih ang angin an ngaihven tih an tarlang.

Section 67 B of Information Technology (IT) Act, 2000 leh Section 13, 14 of the Protection of Children from Sexual Offences (POCSO) Act, 2012 chuan hursualna kaihhnawiha naupang telna video leh thlalak thehdarhtute chu lung in tang tur leh pawisa chawi tura hrem theih an ni an ti. Hei hi mipuiten hriat tlan a tul a ni, an ti bawk.

Internet leh Internet Social Media (ISM) hman kawngah nu leh pa te’n an fate ngaihvena fimkhur pui a tul an ti a, Naupangte pawhin Internet hmansual chungchangah Dan-in an chungah thununna a lekkawh thei a ni tih an hriat a tul an ti bawk.

Mizoram Police Cyber Crime leh District Child Protection Unit (DCPU) te’n tun hnaia thil thlenga rang taka hma la a, Dan anga pawikhawihtute hrem an nih theihna tura an hnathawh leh hmalaknate chu Commission chuan lawmawm an ti.