Aizawl August 14, 2024 : Naktuka AR Lammuala Independence Day hmanna tur leh sawmbikte tana Raj Bhawan-a inkawmhona buatsaihna tur bakah CM Bunglow-ah venhimna tihkhauh a ni dawn a, tunge an nih hriat theihna tur Identity Card nei lo te chu heng hmunah te hian luhtir an ni dawn lo.

Identity Card-ah hian tihbik a awm lo chuang lo a, School naupang chuan an School Identity Card ken mai tur a ni a, sawrkar hnathawk pawhin sawrkar atanga Identity card an dawn kha keng mai tur a ni a, heng ID card nei hran lo te chuan voters ID ken mai tur a ni. Tunge an nih tih hriat loh chu luhtir an ni dawn lo tih Aizawl SP Rahul Alwaal chuan a sawi.

Rangvamual, Durtlang, Silaimual, Zemabawk leh Ramrikawn-ah te Check point siam a ni a, chhuak leh lut te an endik vek a, Heng hmunah te hian GO-7, Unarmed -110, leh Armed Platoon 4 leh Section -1 an duty bawk. AR Lammual chu nimin atang khan Armed platoon 1 leh Unarmed - 8-in an veng tawh a ni. Police 250 heng hmuna duty hian ruat an ni. Hetiang an tih chhan chu thenawm ram-ah te buaina a chhuah nasat vang a nih thu Aizawl SP chuan a sawi.

Tunlaiah Drone hmanga inbeihna te a nasat tawh avangin AR Ground, Raj Bhawan leh CM Bungalow te chu Drone tan No Flying Zone-ah puan a nih angin a vengtu tur pawh an inruat a, Lammual bawr vela building sang hovah vengtu dah an ni bawk.

Tun tumah hian parade contingent 27 an tel dawn a, hetah hian Armed - 7, Unarmed - 5, School - 12 leh Band - 3 an tel dawn a, 1st MAP chu Meghalaya lamah I-Day parade tura an kal avangin tun tumah hian an tel dawn lo a, 10th Batallion, Tripura Rifles te chu tun tumah hian an rawn tel dawn a ni.