Aizawl : Health Minister Dr. R. Lalthangliana chuan nimin khan Civil Hospital, Aizawl-ah Medical Intensive Care Unit (ICU) ward thar, khum 10 awmna a hawng. Medical ICU ward dang khum 10 awmna reilo teah peih fel a nih tur thu a sawi.

Civil Hospital Conference Hall-a ICU thar hawn puala inkhawm buatsaihah Khuallian Dr. R. Lalthangliana chuan, "Vawiin hi Mizoram tan ni chhinchhiah tlak, mellung thar kan phunna ni a ni a, Civil Hospital, Aizawl chu damlo na zualte enkawlna tur ICU khum 10 zet kan neih belh ta hi a lawmawm takzet a, damlote tan malsawmna a nih bakah sum tam tak damlo ten an sen thin pawh nasa takin a chhawk zangkhai thei dawn a ni," a ti a. Medical ICU ward dang khum 10 awmna pawh Civil Hospital,  Aizawlah hian reilote ah peihfel a nih tur thu a sawi bawk. 

Health Minister chuan, "Civil Hospital, Aizawlah hian hun rei tak khum 5 awmin kan kal reng a, tunah hian 15 ah tihpun a ni ta a, reiloteah Medical ICU khum 10 dang kan peihfel dawn bakah Pediatric ICU khum 4 leh Obstetric ICU khum 4 awmna peihfel a ni dawn bawk a, peihfel a nih hunah chuan ICU khum 33 a awm tawh dawn a ni," a ti.

Dedicated COVID Hospital- Zoram Medical College-a ICU khum 34 awm mek bakah khum 20 dang dah belh tura hmalakna pawh kalpui a nih thu a sawi a, ICU ward thara thawk tur nurse 50 sawrkarin a lak mek thu leh ICU ward thara thawk tur staff dang lak tawh sate pawh training pek vek tawh nia sawiin, ventilator rawn vuah tur Company technician te pawh  hna an thawk nghal char char thu leh kar leh lamah hi chuan khum engemawzat hi chu kan hman tan theih a beisei thu a sawi.

Civil Hospital, Aizawlah Magnetic Resonance Imaging (MRI)  bun tura hma lak mek a nih thu leh hun rei tak thawh chhunzawm loh Trauma Centre sak pawh chhunzawm turin hmalak mek a nih thu leh Civil Hospital ram chhunga medical quarters sak tura ruahmanna siam pawh a theih ang anga bawhzui mek a nih thu a Minister hian a sawi. Nephrology Department din tura hmalakna pawh thui tak kalpui a nih thu leh Boeing Company atangin sum hmun beisei a nih thu tarlangin ZMC tan pawh Boeing Company atang tho hian beisei a ni, a ti.

Civil Hospital, Aizawlah hian kum 2007 khan Medical ICU khum 3 dahin bul tan a ni a, kum 2012 ah khum 2 dah belhin khum 5 ah tihpun a ni a, tunah hian khum 10 dah belhin khum 15 a awm a, ward dang khum 10 awmna peihfel a nih hunah chuan Medical ICU khum 25 a awm tawh dawn a ni.