Aizawl : Indian Medical Association (IMA), Mizoram State Branch President Dr. Rosang-luaia chuan Covid-19 hri leng chungchangah boruak a that chhoh chuan kar hnih hnu velah tun aia inthlahdul hret a ngamawm tawh a a rin thu a sawi.

ZALEN zawhna chhangin Dr. Rosangluaia chuan Covid reng reng chu ni 10 atanga 14 vela lang chhuak a nih thu sawiin, tun ang dinhmun a nih chhoh zel chuan kawng thenkhatah inthlahdul hret hret a ngamawm tawha a rin thu a mi mal ngaihdan a sawi a. Chutihrualin Covid hri leng atanga zalen deuhthaw tawh anga in-chhal chu Krismas leh kum thar boruak vangin fimkhur a la ngaih thu leh kar hnih emaw vel ngaih-chanin boruak tha lo a awm lo a nih chuan biakin a inkhawm kher lo, programme dang buatsaih pawh tun aia thlahdul hret a ngamawm tawha a rin thu a sawi.

“Hei chen hi kan tuar tawh a, la fimkhur zel i la, kan dinhmun a that zel chuan tun ang lo deuha tlema intlahdul deuh hi sorkarin a tih ngam ka ring a; mahse, Covid hma anga zalen taka kohhran programme leh programme dang neih ang chi erawh sorkarin a la remtiin ka ring lo,” IMA, Mizoram State Branch President chuan a ti bawk.

Mizoram Kohhran Hruaitute Committee (MKHC) secretary Rev. R. Lalrinsanga pawhin ZALEN zawhna chhangin, kohhran inkhawm leh kohhran programme dang neih chungchang sawiho turin MKHC committee koh an rawt mek thu a sawi a, Covid hri leng a zia-awm chhoh chuan kar hnih hnu velah sorkar a inhawng zau deuh mai ang em tih chu a mi mal ngaihdan a nih thu leh Covid hri leng chungchangah thil thleng palh thei a tam avangin MKHC anga kohhran inkhawm pangngai neih rawt chu thil har tak a nih thu a mi mal ngaihdan a sawi.