Aizawl: Importer & Exporter Code Holder Association of Mizoram (IEC) chuan April 24, 2019 atangin Myanmar atanga bungraw lokal leh chho turte chu Zemabawk mining check gate bulah dan an tum tih an sawi.
Importer & Exporter Code Holder Association of Mizoram hruaitute hian nimin khan Aizawl Press Club-ah chanchinbumite kawmin an hmalak tum dan hi an puang a. Importer & Exporter Code Holder Association of Mizoram working chairman R.Lalruatfela chuan dan ang thlapa sumdawnna permit nei an ni tih sawiin mi thenkhat, phalna pawh nei mumal loten sumdawnna an kalpui leh a hlawkna tak tak mipuiten tel lova phai lam mi lianten an hlawkpui ringawt chu an duh lo tih a sawi a. “Zokhawthar kaltlang hian thla tin nuai tam tak sumdawnna kalpui a ni a, Zokhawthar leh Champhai lama pawl insiamchawpten dan siamin Champhai district registration nilo motor chu kal an phal lo a. Hei mai bakah dan anga chhiah pek a ni lo a, chhiah pek that a nih loh avang hian sawrkar chuan thla tin vaibelchhe 4.32 a hloh bawk a, heng zawng zawng hi tihtawp a nih theih nan lirthei lut leh chhuak hi dan kan tum a ni,” a ti.
Zawhna chhangin sumdawnna kalpui mekte zingah dan anga license nei mi thenkhat an awm tho tih sawiin sumdawnna bungrua 60%-70% vel chuan chhiah an chawi lo niin an sawi a. Bungraw lakluh leh thawn chhuah theihna license nei mi 50 vel an awm niin an sawi.