India ramah hian naute thi zatin tlakhniam lam a pana thu lawmawm a awm mek laiin nau piang an pung chak lo ve thung.
    Kum 50 liam ta chhungin nasa takin nau piang zat hi a tlahniam a. Kum 1971-a mi 1,000 zela nau piang 36.9 awm ang ni chu kum 2020-ah chuan 19.5 chauh a ni tawh.
    He kum 50 chhung hian thingtlang leh khawpuia nau piang inthlauhna a kar a zau lo hle bawk a. Thingtlang lamah piang an la tam hret zawk chauh va, khawpui nena an inthlauhna erawh a tam lo.
    Mihring 1,000 zela nau piang zat hi kum 10 liam ta chhung khan 11% chuang mahin a tlahniam a. Kum 2011-a 21.8 chu kum 2020-ah chuan 19.5-ah a tla thla.
    Thingtlangah kum 10 liam taa 23.3 chu kum 2020-ah chuan 21.1-a tlain a tlakna hi 9% vel a ni a. Khawpuiah kum 2011-a 17.6 chu tunah chuan 16.1 niin 9% chuangin a tlahniam.
    Mihring zat atanga nau piang zat, birth rate hi mihring pun dan chhutna a nih piah lamah nau pianna hmun/ram tha a nih leh tehna pawimawh tak a ni a. Nakin zela ram dinhmun hriltu a ni pakhat bawk.Kum tam tak chhung India ramah nau piang hlim atanga kum khat an tlin hmaa thi (infant mortality rate) chuan ziaawm lam pan tawh mah se heng rual naute 36 zela pakhat hi thi zel ang an la ni tho tih sorkarin a chhinchhiahnaah tar lan a ni.

Aizawl : Infant Mortality Rate (IMR) hi ram khat emaw, ram bial khat emaw hriselna dinhmun thlirna pawimawh tak a ni a, an pian atanga kum khat tlin hmaa naute 1,000 zela thi zat sawina a ni.

Registrar General of India-in a chhinchhiahna a tihchhuah thar berah chuan kum 2020 khan IMR hi 28 a ni a. Kum 1971-a naute 1,000 zela 129 thi lakah chuan hmasawnna nasa tak a ni.

Kum 10 liam ta chhung khan India rama IMR hi 36% chuang mahin a tlahniam a, kum 10 kal taa naute 1,000 zela 44 thi kha 28 chauh a nitawh.

“Thingtlang lamah 48 atangin 31-ah a tla a, khawpuiah 29 atangin 19-ah a tla ve thung a. Thingtlangah hian 35% chuang leh khawpuiah 34% velin a tlahniam hman a ni,” tiin report-ah hian tar lan a ni.

“Kum 10 liam ta chhungin IMR hi nasa takin tlahniam mah se naute 36 zela pakhat chu an piancham a thlen hmain an thi a ni,” tia tar lan a ni bawk.

Kum 2020 chhung khan IMR a sanna ber chu Madhya Pradesh niin naute 1,000 zelah 43 an thi a, Mizoram chu a hniamna ber niin pathum chauh a ni ve thung.