Aizawl July 6, 2023 : Dr. Vanlalthlana, Aizawl North II bialtu MLA chuan vawiin 6.7.2023 (Ningani) hian a bial chhung a Ramhlun South MHIP Day vawi 46-na lawmnaah khuallian niin hun a hmanpui a, nu ho chu pasal fanau te hmakhua an kutah a awm tih a hrilh.

Bialtu MLA Dr. Mathlana chuan thu sawiin, "Mizoramah chuan hmeichhia ten nasa takin hma insawn a, sawrkar pawhin dinhmun tha takah a hlangkai mek che u a, chu chu Kristianna in a rah chhuah a ni. Hmasawnna kawng hrang hrangin min nek velna karah hian kan nuho te in inrintawn a, in infuih thar reng a, in intih chak tawn a ngai a ni. Chhungkaw nu ber te in ni a, chhungkuaa in mawhphurhna sanzia te i hre thar leh ang u, kan pasal fanau te hmakhua hi kan kutah a awm a, thu tha hi kan chhungkuaah kan sawi tam a ngai hle a, mawhphurhna sang tak kan kawl a ni," tiin kal khawm te a fuih.

Dr Mathlana chuan Prime Minister Insuarance Scheme PMJJBY leh PMSBY te hi chhung tin bank account nei zawng zawngin la theuh turin a ngen nghal bawk.

Ramhlun South MHIP Day lawmna hi anmahni Hall, Ramhlun South-ah hman a ni a, kum 1977 ah din niin, tunah hian member 2345 an awm mek a ni.