Aizawl : Aizawl DC Dr. Lalhriatzuali Ralte hovin nimin khan SEC in COVID-19 hripui, a bik takin a chi thar Omicron Mizoram a darh loh nana inkaihhruaina nimin atanga hman tan tur a chhuah thar chungchangah Aizawl DC-in hma a lakna tur leh ruahmanna a siam tur chungchangah inrawnkhawmna, Aizawl SP Office, Conference Room-ah neih a ni.

Aizawl DC chuan, “Covid-19 chi thar, Omicron laka kan him theih nan sawrkar duan inkaihhruaina SOP te leh CAB te mi tinin kan ngaih pawimawh thar mai bakah hengte hi khauh taka kan kalpui theuh a tul a. Mipui tana harsatna siam zawnga ruahman siam hi kan duh ber a ni lo va, mahse, kan him tlan nan siam a ngai fo thin. Mipui te chu entik lai pawhin mask hreng a, sanitiser hmang a, midang nena inchiahpiah zawngin a tlem thei ang bera khawsak a ngai a ni,” tiin mipuite a ngen.

Inrawnkhawmnaah hian zau takin AMC area chhunga inkaihhruaina kalpui tur thenkhat a bik takin Sakhaw Biak In leh inkhawm, bungraw load leh unload, mi mal tui chawi, restaurant leh bazaar leh dawr hawn dan chungchanga inkaihhruaina kalpui dan tur duan leh ruahmanaah MKHC, MIMA leh MBCC hruaitute chuan an ngaihdan leh ruahmanna tha nia an ngaih te an sawi chhuak. 

Sumdawng pawl hruaitu te chuan inkharkhipna rei tak lo kalpui tawhin sumdawng te a nghawng nasat avangin mipui te himna dah pawimawh chung a, dawr leh bazaar hawn dan tur, inhawnchhawk tlem thei ang bera ruahman turin an ngen a ni. 

Khawhar in lenpui chu fimkhur taka kalpui a tul thu sawilan a nih bakah inkhawm chungchanga CAB khauh taka kalpui a nih thei nan LLTF te sawma CAB/SOP Implementation Committee din chu Kohhran tinin ngaipawimawhin din ngei se tia rel a ni.

Inrawnkhawmna zulzuiin Aizawl DC hian dawr leh bazar hawn dan tur ruahmanna chu a chhuah beisei a ni a, hei bakah hian ruahmanna tul dang pawh a chhuah beisei a ni bawk.

Meeting ah hian Senior SP Traffic, Aizawl; Aizawl DC Office a thawk officer te, CMO (East leh West te) MKHC, MIMA, MBCC, All NGO Coordination Committee leh Aizawl City Local Councils’ Association hruaitute an tel a ni.