Aizawl: MNF President Zoramthanga chuan nimin zing khan Mission Veng South-a C. Rochhinga in kawtah 'Independence puanna hmun hriatrengna lungphun' a hawng a, lungphun hawnna hmun hi March ni 1, 1966 zan laia MNF-in independence puanna hmun kha a ni.

MNF President leh Chief Minister ni bawk Zoramthanga chuan lungphun hawnna thu sawiin, "March ni 1, 1966 khan heti laiah hian independence puan a ni a. A hunlai kha chuan a ropui lo khawp mai. Amaherawhchu, a thawm erawh a lian hle a ni," a ti. India rama Mizoram a beh dan sawiin, "British an chhuah dawn khan India in min awp si lova, mithiam ten engtinnge kan awm dawn an ti a. Ngaihdan hrang hrang awmin India-ah kan tel ta ringawt mai a ni," a ti a. Ram buai hnu sawi chhunzawmin, Pu Laldenga hova India nen an indawrnaah India Preamble siam a nih laiin kan tel ve lohna Constitution in siam a, barh luih kan ni, tia India sawrkar an hnial thu a sawi. 

MNF ten silai an chelek chhan sawiin Zoramthanga chuan, "Union Home Minister, Assam CM leh Laldenga ten Shillong-ah tripartite agreement an siam laiin, Pu Dengan silai kan hmang lovang a ti a. Amaherawhchu, February 1966 atangin para military leh sipai an rawn tir ta zel a. Hetiang a nih avang hian silai kenga zalenna sual a ngai ta a. India lak atanga tal chhuak turin keimahni leh keimahnin independence kan lo puang ta a ni," a ti bawk.

Nimin zing vek khan MNF Diamond Jubilee Celebration Committee buatsaihin Diamond Jubilee lungphun hawnna chu hmun hrang hrangah neih a ni bawk a. Phunchawng dai, Sairang Road-ah MNF Sr. Vice President & Dy. CM Tawnluia chuan lungphun a hawng a. Melthumah MNF Vice President Vanlalzawma hovin neih a ni a. Selesihah MNF Vice President Lalthlengliana leh Zemabawk-ah MNF Treasurer K Vanlalauva ten lungphun an hawng bawk a ni.