Darkar 24 liam ta chhung khan India ramah hripui kai thar mi 14,506 zet an awm a, hetih chhung vek hian mi 30 ten nunna an chan bawk. Hei hi tun hnaia ni khat thil thua hri kai an tam leh ber tum a ni a, Mizoramah pawh hrikai mek mi 200 chuang an awm leh tawh. 

India ramah covid-19 in zual lam a pan chho leh mek a, state tam takin an mipuite fimkhur turin an chah leh tan mek. Tun dinhmunah hri kai zat chu 99,602 ah a kaichho leh tawh a, a ni telin an pung chho zel bawk. Union Health ministry tarlan an chuan hrikai zat punna hi 0.23% a ni a, dam tam lam chu 98.56% a ni mek. 

Darkar 24 liam ta chhung khan hrikai dam mi 11,574 an awm a, kai thar aiin mi 2932 in an tlem zawk a ni. Vaccine pawh uar taka sem chhunzawm zel a ni a, ram mipui tam zawkin dose kimin an la tawh. Hetih lai hian Serum Institute of India siam chhuah Covovax pawh DCGI chuan naupang tan a him tih a pawmpui tawh a, naupang kum 7 atanga 12 inkar hnenah pekchhuah mek zel a ni. 

US-ah chuan hri kai mek zinga 50% vel chu Omicron sub-variant - BA.4 leh BA.5 te an ni a, hei hi India-ah pawh a darh chhoh mek nia tarlan a ni.