India ram hmun hrang hrangah Covid-19 a darh chho leh mek a, ni telin hri kai an pungchho zel. Dar kar 24 liam ta chhung khan hri kai thar 13,615 lai an awm rualin, nunna chan mi 12 an awm belh leh ta bawk. 

Union Ministry of Health and Family Welfare chuan hri kai thar awm zat leh nunna chan zat hi an tarlang thin a, tun hnaiah a pung chak hle. Tun dinhmunah hrikai hi India ram pumah 1,31,043 an awm leh mek tawh a, tun hnaiah phei chuan nitin case thar sing chhuang hmuhchhuah ziah a ni.

Hri kai thar punna hi 3.23% a ni a, Delhi-ah pawh a punna hi 4.21% a ni chho leh tawh. Hetih lai hian West Bengal-ah chuan hri kai punna hi 21.29% zet a ni a, a pun chakna ber state an ni mek. West Bengal-ah hian hri kai hi mi 20,53,626 zet an awm tawh a ni. Telangana leh Mizoram pawh hri kai punchakna state zingah an langsar viau bawk. 

Tripura sawrkar chuan Covid-19 laka mipuite him theihna turin thupek khauh tak a tichhuak leh tawh a, state dangte pawh an inralring chho mek.