India ramah khua a lum hma a, tun hnai maiah pawh electric hman chuan a san ber lai a tawng mek a, nipui lo thaw turah power supply khaihlak mai hlauhthawnawm a ni mek.

January-ah khan electric man hi gigawatt 211 zet a tling a, nipui vanglaia hman tam ber hun lai a tawng thuak nghal.

Kar liam taah khan India ram hmun hrang hrangah February thla tawpa a nih dan thin aiin 11°C zeta a lumna hmun a awm nual a. India Meteorological Department (IMD) chuan lo neitute hnenah an khaw lum lutukin an wheat leh thlai dang a tihchhiat theih dawn thu an sawi lawk.

Hma taka khua a lum hian power mamawhna a tisang a, irrigation pump leh air conditioner mamawhna a sang a. Hei hian kum hnih a zawna power khaihlakna thleng tawh a chhunzawm ang tih hlauhna a awmtir mek.

Ram dang atanga lungalhthei lak luh hmang power station-te chuan khaihlak a awm loh nan nipui thla thum chhunga hman turin an chah lawk tawh hlawm a. Power ministry chuan April thlaah chuan electric mamawh hi gigawatt 229 a tlin an ring.

“February thlaa khaw lum hi thil thleng pangngai a ni lem lo va, kan hmaa lo thleng leh zel tur phei chu buaipuiawm tak a ni,” tiin Rajasthan Poer Minister Bhanwar Singh Bhati chuan a sawi a. “Nikum nipui aiin kuminah hian electric mamawh hi 20-30% velin a san a rinawm a. Power supply tihtawp zeuh zeuh mai loh chu tihtheih a awm lo,” a ti.

Rajasthan hi India-ah chuan solar energy hmunpui a ni a, nipui laia a laih chhuahna hmun atanga lungalhthei  chah thlen mai loh nan hetiang hi an kalpui nasa a ni.

India-a electric siam chhuah nana hmanraw hman 70% chuang hi lungalhthei a ni a, March thla tawpa mamawh tur hi tonne maktaduai 45 tal a tlin rin a ni.

India-a lai chhuak tam ber, Odisha chuan a huna laih chhuah leh a dahna tur hmun thlen theih dan azirin mamawh hi pek theih a ni dawn tih a sawi.

Lungalhthei tlakchham a nih chuan India-a power pek chu a buai a ni dawn tih mi thiamten an sawi bawk.