India ramah darkar 24 liam ta chhungin COVID-19 kai mi 20,044 hmuh chhuah leh hman niin mi 4,37,30,071-in an kai ta.

Tun hnaiah hri kai hmuh an pun leh mek avangin a kai enkawl lai pawh an pung hret hret zel a, mi 1,40,760 an ni mek tih union health ministry chuan a tar lang.

Darkar 24 liam ta chhung hian mi 56 laiin hripui hi thihpui leh hmanin mi 5,25,660-in an thihpui tawh.

Darkar 24 liam ta chhung hian enkawl dam aia a kai hmuh thar an tam zawk avangin enkawl lai hi mi 1,687-in an pung leh hman a, a kai hmuh tawh zawng zawng atanga chhutin 0.32% an ni mek a, 98.48% erawh enkawl dam an ni leh tawh thung.

Darkar 24 liam ta chhunga sample endik zinga 4.80% chuan hri an kai tih hmuh chhuah niin chawlhkar khat liam ta chhunga endik zinga 4.40%-in an kai bawk.

Hri kai hmuh chhuah tawh zinga mi 4,30,63,651 chu enkawl dam leh an ni tawh a, thihpui hi a kai tawh zinga 1.20% an ni thung.

Union ministry-in a chhinchhiah dan chuan invenna pek mek zelah vaccine dose vaibelchhe 199.71 chuang zet pek a ni tawh.