Tun lai hrileng pakhat monkeypox chu a vawi khat nan India-ah kai an awm tih puan a ni ve ta. Union Health Ministry chuan hri kai hi Kerala mi UAE atanga lo haw a nih thu an puang a, mipuite fimkhur turin a chah bawk.  

Monkeypox hi khawvel ram hrang hrangah a darh mek a, Covid-19 ang ema darh chak erawh a ni lo thung. India rama hrikai an hmuchhuah hmasak ber hi mipa kum 35 mi Kerala-a cheng a ni a, ni thum liam ta khan UAE atangin a lo haw a ni. Kerala Health Minister Veena George chuan Ningani khan hri kai thar an neih mai theih thu hi a lo puang lawk tawh a, National Institute of Virology, Pune-ah test neih a nih hnuin monkeypox ngei a nih thu nemngheh a ni ta a ni. 

Hri kai hi tunge a nih puanzar a ni lo a, Thiruvananthapuram Government Medical College Hospital (MCH) ah dahluh nghal a ni. India-ah monkeypox kai an awm tak avang hian Health Ministry pawhin invenna lamah chak zawkin hma a la nghal a, WHO-in inven dan a tichhuahte pawh a theih chin chinah a zawm chho mek a ni.