ZALEN, June 02, 2026: June thla chawhnu lama International Federation of Muaythai Associations (IFMA) Senior World Muaythai Championships 2026 neih turah India aiawhin Mizo tlangval, Isaac Lalchhuanmawia a inlan dawn.

Kuala Lumpur, Malaysia-a June 16-29 chhunga neih tur inelnaa India aiawh tur, Isaac-a hi Aizawla Chanmari Venga cheng hi United Muaythai Association - India (UMAI)-in ram aiawha tel tur a thlan chhuah zingah a tel a ni.

Isaac-a hian January thla khan Hyderabad, Telengana-a 7th UMAI Senior National Muaythai Championship 2026-ah -71kg (U-23)-ah gold medal a la a. Kuala Lumpur-a inelnaah pawh he huangah hian a inlan dawn a ni.

World Muaythai Championships-a tel tur hian ram hrang hrang 100 chuang atangin an inziak lut tawh a, Muaythai player tha ber ber an inlan ang.

Malaysia-a inelnaa Isaac-a a tel theih nan hian Mizoram State Sports Council (MSSC) chuan sum leh pai mamawhte a phuhruksak a, Muaythai Association of Mizoram (MAM) chuan lawm thu a sawi a, an player feh chhuahna turah hlawhtlinna chang ngei turin duhsakna an hlan bawk.