Asia khawmualpui chhimchhak lam ramten tunlai hian furpui an tuar mek a, India pawh a tuar na ber zinga mi niin ruah a tam a; tui lian, lei min leh tek tla leh a kaihhnawih hrang hrang avangin mi 2,000 chuang zet an thi tawh.

Union home ministry-in June atanga intan furpui kal mekah hian ruah sur nasa hian lo hectare 5,00,000 (acre maktaduai 1.24) vel zet tibuai tawhin chenna in 90,000 dawn a tichhe tawh a. Ranvulh 60,000 vel a thi tawh bawk.

India-ah hian June leh September inkar hi furpui a ni a, hei hi a ramin lo atanga a thar chhuah thlaiten tui an mamawh zahve vel zet petu a ni a, ei in lama ram thawh chhuahna hnar pawimawh leh sum leh paia a thanna bulpui a ni a; hetih rual hian chhiatna tam tak a thlen tel thin bawk.

Weather office chuan sik leh sa inthlak nasa avangin kum khat chhunga khaw awm dan tur hi sawi lawk a haruin inthlak thut thut a tam niin an sawi a. Khaw awm dan a uchuakin tui lian leh khawkheng thlengin a nasa telh telh niin an sawi.

Nikumah pawh khan khaw awm dan uchuak tak hian wheat chin a nghawng nasa hle a, 2023-24 chhung atan pawh hian fu thar chhuah zat tur a nghawng rin a ni a. Sorkar chuan ei leh in man a to phah lutuk loh nan ruahmanna chi hrang hrang a siam tawh nghe nghe. 

Prime Minister Narendra Modi-a kaihhruai sorkar, nakum kum chawhma lama inthlan hmachhawn tur pawhin wheat, buh leh fu thawn chhuah a khap tawh a; sorkarin grain a dahkhawl sa hralh chhuah a titawp tawh bawk. 

Ruah sur nasa hian October thlaa seng tur buh ding lai pawh a khawih chhiat phah rinna a awm bawk. 

India Meteorological Department (IMD) chuan state eng emaw zat - Bihar, Himachal Pradesh, Odisha leh Madhya Pradesh te chuan ruah tam tak dawn an la hmabak niin an sawi a. Sabereka khuangkaih thlengin la tuar thei niin Zirtawpni khan a sawi. 

India-ah hian furpui tuar na ber chu Himachal Pradesh niin fur a intan atang khan mi 330 chuang an thi tawh a. Thawhtanni zan khan tuikhuahin a dawl loh mai hlauhthawnna avanga a tui an chhuah chuan mi 500 vel a la dang mek a, Air Force helicopter hmangin lak chhuah hna la thawh mek a ni tih home ministry chuan a sawi.

Indian Army leh National Disaster Response Force (NDRF) chuan Ningani khan Punjab-a tui lenna hmun atangin mi 300 chuang an chhanchhuak bawk niin news agency PTI chuan a tar lang. 

Delhi leh Mumbai khawpui pawh thla hmasa lamah khan ruah tam tak dawngin ni eng emaw zat tui lian buaiin an lo buai tawh bawk.

A tuar na ber state-ah ‘state calamity’

Kumin furpui tuar na ber la ni rih, Himachal Pradesh-ah chuan Zirtawpni khan state sorkar chuan an chhiatna tawh chu ‘state calamity’-ah a puang ta.

Tlangram state pum pum hi ‘khuarual chhiatna thlenna hmun’ tia sawi niin nunna leh thil dang tam tak a chhe tawh tih sorkarin hriattirna a chhuahah tar lan a ni. 

State calimity puan a nih hma chawhma lamah Chief Minister Sukhvinder Singh Sukhu chuan PTI hnenah a sorkar chuan ruah sur nasa lutuk avanga an chhiat tawh chu ‘state calamity’-a puan an tum thu a lo sawi lawk tawh a. Sorkar laipuiin ‘chhiatna thlenna’ tia puan tura a pawmpuina an nghah mek thu a sawi a ni.

Principal Secretary (Revenue) Onkar Chand Sharma chuan khaw awm dan a ziaawm hunah chhiatna an tawha an thil hloh hrang hrangte hlutna chu an la chhut ang a, sorkar laipuiah report thehlutin intun dinna lehna tur leh siam thatna tura sum awm theite an dap dawn tih PTI a hrilh ve bawk.

Himachal Pradesh-ah hian thi 77 zet an awm tawh a, heng zinga 23 hi an khawpui, Shimla-ah a ni a. Nunna chân bakah hian kawng ping, lei, in leh lo leh huan chhia leh tui lian a nasa hle a. Tawmhulna tur nei lo pawh an tam tawh hle a ni.