India-a eptu party dawrzawn hnih chuang zette intel khawm chuan kum 2024-a ram inthlanpuiah Prime Minister Narendra Modi-a kaihhruaina hnuaia Hindu nationalist BJP-in a zawna vawi thum nana hnehna chan an tum dan tumin tan an la mek.

Party 28 tanghote hian Indian National Developmental Inclusive Alliance (INDIA) tia invuahin a vawi thum nan Zirtawpni khan an thukhawm leh a, vote a darh loh nan state hrang hranga bial an inchan sem dan tur tihfel ran an tum.

Thuchhuah an siamah, “Keini, INDIA party-te hian Lok Sabha inthlan lo awm turah hian a theih chin chinah a huhova chuh kan tum,” an ti.

“State hrang hranga bial inchan sem chu a rang thei anga tih hmasakj tur a ni a, a hma thei ang berin thawhhona thinlung pua inpek leh leh inlaksak turin kan ti ang,” an ti.

India ram inthlanpui hi May bawr vela neih tura ngaih a ni.

Zitawpni leh Inrinnia India sumdawnna leh hlimhlawp khawpui, Mumbai-a thutkhawmah hian Indian National Congress party hruaitu zingah Sonia Gandhi leh Rahul Gandhi pawh an tel a. Eptu hruaitu zingah Sharad Pawar, Arvind Kejriwal, Sitaram Yechury leh Lalu Prasad Yadav te pawh an tel.

An tum ber chu bial tinah BJP-in chuhtu tura an dintir apiang chu a huhova tanga pakhat dintira mal beih zel a ni.

INDIA hi June thlaa din kha niin Modi-a party-in eibara ram dinhmun a siam te, hna nei lo tam leh tual chhunga thil thleng hrang hrang, a bikin Muslim huatna lam hawia thil thleng te chu an beih leh sawi lan zin ber zingah a tel.

“Kan thuchah puangin hmun hrang hrangah kan zin kual dawn a. Chanchinbute zalenna neihte pawh kan duh a, kan tangho zel dawn a ni,” tiin Bihar Chief Minister Nitish Kumar chuan an thutkhawm zawha thuthar lakhawmtute a kawmnaah a sawi tih The Indian Express chuan a tar lang.

Congress party president Mallikarjun Kharge chuan khawtlanga mi tin mai, vantlang chung lam leh chanchinbumite thlangin, BJP-in ‘mi mal thuneihna hmanga ro an rel sual’ chu tawptir an duh niin a sawi ve bawk.

“BJP leh RSS ten kum kua liam ta chhunga chi leh chi inhuatna a thehdarh chu tunah chuan pawisawi lo rel passenger leh sikul naupang lakah thleng inhuatna tuh a ni tawh,” tiin X-ah a tar lang bawk.

Rashtriya Swayamsevak Sangh (RSS) hi Hindu kal firfiak pawl niin kum 1925-a din kha a ni a, Europe-a fascist pawl zuia kal an ni a. India chu Hindu lalna rama chantir an tum.

RSS hi BJP thurawn lakna ber pawh niin Modi-a zuitu maktaduai tel chu an pawlah hian member an ni nghe nghe.

Eptu tangrual, INDIA-ah hian party 28 zet tang khawm mah se mi thiam tam tak chuan Modi-a sorkar paih thlak chu thil  huphurhawm takah an la ngaihpui tho.

Tun dinhmunah hian India-a hruaitu lar ber a ni a, khawvel huap pawha lar a ni a. India-a state 28 zinga 10 chu a pumhlumin BJP hian an thunun a, state dang pali-ah party dang nen tangrualin ro an rel bawk.

Parliament in hniam zawk, Lok Sabha-ah hian  member 543 awm theiah 55% chuang chu amah thlawptu an ni bawk.

Modi-a hi kum 2014-a prime minister ni tan kha niin kum 2019 khan a hma aia chiang zawkin BJP leh a kaihhruaite chu hnehna a chanpui zui leh bawk.

Mi thiamten an chak zawh la ring zo chuang lo mah se Modi-a sawiselna thei ber pakhat, Congress MP Gandhi-a chuan, “INDIA hi India ram mipui zinga 60% zet kan ni a, kan tanho that phawt chuan BJP tan hnehna chan ngaihna a awm lo,” tiin Zirtawpnia an thutkhawm hnuah hian a sawi.

Modi-a hi hruaitu lar ni mah se BJP-in Hindu vawrh lar a tum lutukna lamah Muslim leh hnam tenau zawkte an nepchep nasa nia sawi a ni a, chanchinbumite pawh an chep a. Hei hi eptute pawhin an beihna hmanrua ber a ni.