ZALEN August 16, 2026: Nimin khan India ram pumah zalenna hmuh vawi 80-na ropui taka lawm a ni a. Mizoramah chuan a lawmna pui ber, Lammualah neih niin hkhuallian, Chief Minister Lalduhoma chuan, “Mizorama kalpui theih chi centrally sponsored scheme zawng zawng chu SNASPARSH-ah kan dah lut vek tawh a, hun tiam chhunga tha taka kan kalpui avangin sawrkar laipui chuan hmalak that lawmman Rs. vaibelchhe 350 min pe a ni,” a ti.

India zalenna hmuh vawi 80 lawmnaah hian khuallian chuan, “Kan thalaiten eizawnna kawng thar dapa sumdawnna hlawk zawk an neih theih nan Mizoram Bana Kaih Venture Capital Fund kan siam a, hei hian Rs. vaibelchhe 20 corpus a keng tel a. Thalai, mahni kea din tumten bul an tan theihna tur, kan state sawrkarin venture capital a siam vawi khatna leh hmasa ber a ni,” a ti.

Chhiah atanga sum lak a pung tih sawiin chief minister chuan, “Chhiah lak dan siam thatna pawhin rah tha tak a chhuah mek a. Kum 2025-26 chhunga kan chhiah tlingkhawm chu Rs. vaibelchhe 1278.55 zet a tling a, 3.35% atangin 11.20%-ah a pung chho a. GST 2.0 kan hman mek pawhin chhiah lakkhawm dan felfai leh zau zawk min siamsak a, hei hian ram tana hmasawnna hna kan thawh zelna turah min tanpui a ni,” a ti.

Sawrkar hmalakna dang tar langin chief minister chuan, “Sawrkar inrelbawlna fel fai, tha zawk leh tunlai khawvel thiamna hmanga tihchangtlun kawngah tan kan la a. Secretariat tiamin sawrkar office 45 zetin e-office an hmang tawh a. Sawrkar tha nei tura mipuite pawimawhzia hriain kan ram mipuiten sawrkar inrelbawlnaah lungawi lohna emaw, rawtna emaw an thlen theihna tur kan siam a. CPGRAMS kaltlanga case lo lut 90% chin fel niin, Mipui Aw kaltlanga lut 91% chin fel tawh a ni,” a ti bawk.

Chief minister thusawi langsar dangte

NABARD RIDF leh SASCI project hmangin Rs. vaibelchhe 61 sengin link road leh PCC pavement siam a ni.

Kum 2025 chhungin sawhthing leina support price atan Rs. vbc 40 dawn pek a ni a, kum 2026 chhungin Rs. vbc 22 dawn pek tawh a ni.

National livestock mission hnuaiah animal insuramce scheme kalpui a niin tun dinhmunah ranvulh 3,290 vel insurance tihfel tawh a ni.

Mizoram luia nungchate humhalhna atan branch YMA 93 nen thawhho a ni.

Mizoram state special ration package chu chhungkaw 29,000-in an chhawr tangkai tawh a. Kum 2026-27 atan monsoon stock buhfai quintal 1,67,016 dah khawl tawh a ni a, sawrkar sum luangral tur Rs. vbc 73.24 hum a ni.

Megawatt 10 pe chhuak thei Thenzawl solar plant hman theih a ni tawh a, megawatt 24 pe chhuak thei tur Tuirini small hydel project pawh thawh mek a ni.

Khawpui hrang hrangah cheng vaibelchhe 467 chuang sengin hmasawnna ruhrel din leh chei hna thawh a ni.

April 2025 atanga April 2026 chhungin MUHCS hnuaiah damlote inenkawlna senso vbc 178.58 hu pek chhuah a ni.

Parade lawman dawngtute

Lammuala Independence Day lawmnaah parade contigent 27 leh band party pathum an tel a, parade a ti tha lawman dawngtute chu:

Armed

1. 34 Assam Rifles

2. 5th IR Bn.

3. 1st Bn. MAP

Un-armed

1. Sainik School, Chhingchhip

2. 20th Mizo Bn. NCC

3. 1st Bn. MAP school

School

1. Mt. Carmel school

2. Synod HSS

3. St. Pauls HSS