Aizawl; Commerce & Industries Minister Dr. R. Lalthangliana leh Tipu Munshi, Hon'ble Minister, Ministry of Commerce, Bangladesh te chuan nimin khan Silsuri - Sajek Border Haat siamna tur hmunhma tlawhin Mizoram leh Bangladesh insumdawntawnna tur kawng hrang hrang an sawi dun.

Bangladesh Commerce Minister chuan Border Haat, Bangladesh leh India insumdawntawnna tur chu ram pahnihte tana thil tangkai tak a nih dawn thu sawiin he Border Haat hi peihfel thuai anih theih nan Bangladesh sawrkar chuan chak taka hma an lak dawn thu a sawi.

Dr. R. Lalthangliana pawhin India leh Bangladesh insumdawntawnna tur Border Haat kan nei tur chu thil lawmawm tak a nih thu sawiin MNF leh India sawrkar inremna Memorandum of Settlement-ah Border Haat kalpui tura ziah lan a nih angin chak taka hmalak tum a nih thu a sawi. Mizoram atangin hralh chhuah tur thil chi hrang hrang, in sakna leh kawngpui siamna hmanrua lung, rawra bakah thlai thar chi hrang hrangte kan nei dawn a. Hei hian kan ram economy a tihsan dawn bakah kan ram tan hmasawnna nasa tak a thlen a beisei thu a sawi. Minister pahnihte hian nimin vek khan Border Haat siamna tur lungphum an phum nghal a. Bangladesh ram chhung Udaipur thleng Border Haat hmunhma enfiahin an kal a ni.