Aizawl: Naktuka India President inthlan lo awm turah ruahmanna engkim peih a ni tawh a. President thlannaah hian NDA candidate Droupadi Murmu chuan Mizoram MLA 40 zinga 29-ten vote-in eptu lam candidate Yashwant Sinha chu MLA 11-in an vote dawn nia hriat a ni.

President thlan turah hian Mizorama rorel lai, Mizo National Front chuan NDA candidate Murmu an vote tur thu hi an tichiang tawh a. ZALEN-in a biaknaah MNF Legislature Party Secretary L.Thangmawia chuan NDA candidate an vote tur thu hi tun hnaia Mizoram rawn tlawhtu, NDA presidential candidate hnenah an party President Zoramthanga chuan a lo hrilh tawh tih a sawi a. “NDA candidate kan vote tur thu hi kan tichiang tawh a, kan MLA-te pawh kim vek kan tum a. Thawhtanni chhun dar 12 hian inhmuhkhawma vote thlak dan chungchang hi inhrilhhriat kan tum a ni,” a ti.

Eptu party, Zo Peoples Movement Legislature Party Secretary Dr. Vanlalthlana pawhin an vote tur chu tichiang tawhin eptu candidate, Sinha an vote dawn tih a sawi a. “NDA-ah kan awm lem lo bawk a; chuvangin, NDA lo lam hi vote ila kan ti a, a huhovin vote pawh thlak ila kan ti a ni,” a ti.

Congress Lagislature Party Secretary Lalrindika Ralte chuan an vote tur an la sawi chiang lo niin ZALEN a hrilh a. “Pathianni hian tihchian kan tum,” a ti bawk.

BJP Mizoram Pradesh hruaitute chuan an MLA Dr. BD Chakma chuan NDA candidate a vote tur thu an sawi bawk. 

President thlanna atan hian Assembly House Committee Room chu ruahman a ni a. Vote hi zing dar 10 atanga thlak tan theih a ni dawn a, tlai dar 5 thleng thlak a ni ang. Vote thlakna ballot box hi naktip, Thawhlehni hian Assembly Secretary & Commissioner H.Lalrinawma chuan New Delhi a panpui dawn a ni.

Mizoram Legislative Assembly ding mekah MNF-in MLA 28, ZPM-in paruk, Congress panga leh BJP ten MLA pakhat an nei mek.

Mizoram MLA-te vote hlutna hi pariat a ni a, Mizoram MLA-te vote hlutna belhkhawm chu 320 a ni.

Mizoram MLA zingah vote thlak thei lo tur an awm lo nia thudawn a ni.

Mizoramin MP a neih pahnih, C.Lalrosanga leh K.Vanlalvena te chuan Parliament House-ah vote an thlak dawn a, MP-te vote hlutna hi mi pakhatah 700 zel a ni.