July 12, 2023; Ramhlun South tlangval, Lalengzauva, Lalthakima leh Lalbiakngheti te fapa chu India rama Mathematics zirna tha ber, Indian Statistical institute (ISI) Bangalore-a Bachelor of Maths Honour zir turin a inziak  tling.

ZALEN thudawn danin, Lalengzauva hian pawl 12 a pass atangin ISI a Mathematics zir turin ngaihtuahna a seng a, hetihlai hian Mizoram syllabus nen a inthlauh em avangin kum hnih (2) inbuatsaih nan a hmang.

Nikum 2022 khan Kolkata ah coaching kal turin a chhuk a, mahse Bengali tawng an hman nasat avangin vawi 2 vel chauh coaching class a kal a, amahin internet atangin a in zir a, tuma tihbuai lohin Kolkata-ah a inkhung chawt zui a, kumin May 14 khan entrance exam a hmachhawn.

June ni 12 a written result chhuak ah a tling a, July ni 5 khan personal interview hmachhawn lehin, final merit list ah a tling zui ta a ni.

ISI a lutte tan fees chawi a awm loh bakah, thla tin Rs. 5,000 stipend an dawng. ISI ah hian placement a tha a, India ramin Mathematician leh Statistician tha ber ber a chher chhuahna hmun niin, heta zir chhuak tam takte chu Europe lamah an thawk nasa hle. ISI a zir hunchhung hi Bachelor kum 3 leh Master kum 2 a ni.

Lalengzauva hi Mizoram atanga Bachelor level-a Mizo inziak tling hmasa ber nia hriat a ni a. KG - I atanga Class - X chu Kids Care School Ramhlun South ah zo in, HSLC-ah Mizoram pumah 4-na a ni. HSSLC (Science) chu St. Paul's School atanga zovin Mizoram pumah 1-na a lo ni tawh bawk.