India hi mihring cheng kan tam ang bawkin two-wheeler hralh pawh a kal hle a, ram chhunga two-wheeler hralh tla zingah hian Hero Splendor, Bajaj Pulsar leh Honda Activa te an tel a ni. 

India hi ram hausa kan nih loh avangin khawvel-a two-wheeler hralh tamna ber pakhat a ni a, hralh kal ber ber hi man to pui pui leh tha ber ber erawh an ni lem lo thung. Tin, Hero MotoCorp hi khawvel-a two wheeler siam chhuak tam ber an ni bawk.  

India ram two-wheeler hralh chhuah tam 5 te chu:

Hero Splendor
Kan ram chhung ngei a siam chhuah Hero Splendor hi a pian phungah chuan Mizo te mit la tak zawng a ni hauh lo. Mahse, kan chung en duh hauh loh keini aia tawng sang si vai ho erawhin an uar hle thung. An hman uar em em chhan pawh tun laia Mizoram chhunga lei tur vang em em petrol a heh loh vang a ni. Thla liam ta chhung ringawt khan Hero MotoCorp hian Hero Splendor hi unit 2,62,249 chuang an hralh hem mai a, Indian market-a two-wheeler hralh tam ber an ni phak bawk. 

Honda Activa
Honda Activa kick-start awm hi gearless scooter zingah chuan hralh tla ber a ni thung a. Honda-in scooter an siam chhuah zinga fuh ber niin nikum chhung ringawt khan India ram chhungah vaibelchhe 2.5 an hralh chhuak a ni. Honda scooter hi thla hmasa khan unit 1,49,407 hralh chhuakin India rama two-wheeler hralh tam ber dawttu a ni.

Hero Hf Deluxe
Mizoram lama kan hmelhriat lutuk loh HF Deluxe hi Hero MotoCorp siam chhuah tho niin, India rama lirthei ke hnih nei hralh chhuah tam ber pathumna a ni phak. Thla hmasa khan he two-wheeler hi ram chhungah unit 1,27,330 zet an hralh chhuak a, he motorcycle hi ex-showroom-ah cheng 56,070/- man a ni. 

Honda Shine
India market-a two-wheeler hralh chhuah tam lama palina chu Honda Shine hi a in a. Nikum lam ngaihtuah chuan Honda Shine hi an hralh chhuak tam hle a, he motorcycle hi thla liam ta chhung lek khan leitu mi 1,19,765 zet an awm tling a ni. Company lam pawhin Honda Shine hralh kawngah hian thangchhuahah inngaiin nikum chhung khan vaibelchhe khat zet an hralh tling a ni. 

Bajaj Pulsar
Mizoram lamah pawh kan brand hriat lar Bajaj siam chhuah Pulsar pawh hi India rama two-wheeler hralh tla zingah a tel phak a, he company hi motorcycle siam chhuaktu zingah chuan a lar ber pawl niin thla hmasa chhung khan unit 69,241 an hralh phak a ni. Nikum thla hmasa ang nena khikhin ralah kumin hian Bajaj Pulsar hi an hralh tam zawk hle a, YoY growth per cent hi 74.74 per cent zet a tling phak a ni.