Scar Project tiin an phuah a, hei hi foreign ram dangah chuan hriat a hlawh tawh viau laiin, Mizoram chauh pawh ni lo, India ramah hmelhriat a hlawh lutuk lem lo a. India rama a vawikhatna atan Mizoramah Scar Project chu kalpui a ni ve tan ve ta a. Scar model te chuan hmelhmai langin a vawikhatna atan thla an la... January 2, 2015 zan khan, Heritage Lounge-a Heritage Hall of Fame ah Parema Night hman a ni. He zan hlimawm leh chhinchhiahtlak takah hian Scar Project hman niin, Scar Model te thlalak pho chhuahna hun hman a ni a. Thlalak thawhtu te hian tawngtaia Pathian an rawn hnuah, midangte tan malsawmna a nih theih takin tiin an thla te, hmel hmai lang ngeiin an rawn pho chhuak ta! Parema Night Nikum November thlaa hawn chauh, Heritage Wall of Fame ah chuan kawng hrang hrangah Mizo te zinga ropui leh hmingthanna nei te thlalak an tar chhuah zinga mi te tan zan chhinchhiahtlak tak hmang turin nikum kum tawp atang khan ruahmanna siam a ni a. Chu ruahmanna chu a hmasa ber atan January ni 2 zan khan hlawhtling takin buatsaih a ni a. A hmasa ber atan Wall of Fame zing a mi hla phuah thiam, Parema Night hman a ni ta a ni. Parema Night hun hmanah hian Super Trio member zing ami leh hnehsawh taka PRAISE 14 kaihhruai tu Robert Lalduhzuala chuan a hna taka thawkin, a kaihruai a. Lallianmawia, SP (Traffic), Khatla chuan hunserh hmangin, Parema hla sa tute leh Mizoram gospel top artist-te an zai bawk a ni. Hemi zan hian Gaby Ngente ziak lehkhabu — "What has been said about Parema" tih chu Parema hnena hlanna hun hman a ni bawk a. Chu mai bakah, Dr. K. Lalfakzuala, Cancer Specialist chuan power point hmangin cancer awareness neiin kalkhawm te'n hlawkthlak an ti hle. Hemi zana sum lut khawm hi Cancer Foundation Care-ah chhunluh vek tur a ni. Parema Night hman a nih rual hian Scar Project hun hman a ni nghal bawk a. Scar Project hi foreign he'ng — Australia leh Europe khawmualpuiah te chuan an vawrh lar chho viau tawh a. Chutih mek laiin, Mizorama Scar Project programme hman hi India rama a vawikhatna a ni nghe nghe. Eng nge Scar Project Khawvel hmun hrang hrangah Scar Project hi kalpui a lo ni daih tawh. Anni phei chuan "Breast cancer is not a pink ribbon" tiin thu ken ropui tak an lo thawn chhuak tawh reng a ni. India rama a vawikhatna atana Mizorama buatsaih Scar Project hi a tam zawk chuan kan la hmelhriat lo mai thei e. He project hi Gaby Ngente hmalaknain Mizoram bultan a ni a. Scar Model (hnute cancer veite) te'n anmahni inpeknain thlalak neih a ni a, Model te hian cancei vei midangte tan a eng lam an thlir theihna'n leh he'ng an ser te hi zahpui mai lovin, 'kan la mawi tho a ni,' tiin midang cho chhuahna'n an hmel an pho chhuak a, he thlalak Scar Project kan tih bawk hi tunah hian Heritage Lounge ah a duh apiangte en theih turin tar chhuah mek a ni. Scar Project hun huaihawt a nih zan hian Scar Model te hi an hmingah Cancer Pasaltha te tiin Thangchhuah Pian te hlan a ni a, nipui chawimawina hlan an ni bawk. Hemi zana kalkhawm te hi Scar Project thlalak an tar chhuah te hian an rilru a hneh hle a — mittui nen an thlir! Cancer vei dangte tan A bik takin, a hmeichhe zingah hmaia arngeng awm ringawt pawh hian nuam tih lohna lian tak a awm fo thin a. Hei chauh pawh hian ngaimawh a hlawh tawk fu. Chutiang aia nasa chu tu mihring mah hian ser tek tuk nei nih kan duh lo. Kan ser neihte pawh miin an hmuh lohna'n thup hram hram kan tum thin. Chutih laia, mahni hmai lang ngeia hnute cancer ser (scar) thlalaka phochhuah chu an duhthusam reng a ni bik hauh lova, a thente phei chu nula te an la ni. Mahse, an thinlung chu cancer natna avanga ser (scar) hian harsatna a siam lo mai ni lovin, hrehawm tih phahna'n hmang lo turin cancer vei dangte cho chhuah an tum mai zawk a ni. Scar project model zinga pakhat chuan, "Nuam kan ti chuang miah lo! Awlsam takin nuam tih vangin thla kan la bik lo. Mahse, cancer ser (scar) avanga rilru hrehawmna leh thinlunga harsatna tawrh phah lo turin cancer vei dangte cho chhuah kan tum vang mai chauhin a ni kan tih," tia sawiin, "Tawngtaia Pathian chungin, midangte tan malsawmna a nih theih takin tiin thla kan la a ni," tiin Thalai Khawvel a hrilh. Gaby Scar Project atan hian cancer vei mek te'n model nih an in huam thu an sawi zel a, hmalak chhoh zel an tum a ni.