ZALEN August 14, 2023 : April 24, 2021 khan Lunglei khawpui chu kang meiin a tuam a, mei hian Village Council 10 huam chhung a tuam. Kha kang thelha fireman pakua te chu Subhash Chandra Bose Aapda Prabhandan Puraskar Awards 2023 an dawn avangin vawiin khan Independence Day-ah lawmpuina hlan an ni.

Darkar 32 zet Lunglei Fire Station chuan a thelh hna an thawk. Kangmei thelh mih a nih hnuah thlalak pakhat a viral chiam a, chu thlalak-ah chuan fireman Lalnunpuia leh Fireman tho Jessie Malsawmmawia te chu chauh hmel takin an thu. Kha thlalak khan an thawhrim zia a tarlang a, fak an hlawh a, lawmpuina pawh I-Day ah hlan an ni..

Indian National Award for Disaster Management award ngaihhlut Subhash Chandra Bose Aapda Prabhandan Puraskar Awards 2023 an dawn lawmpuina/ felicitation memento hi Khuallian C. Lalrinsanga, Minister hnen aṭangin an dawng a, Director General, Fire Service, Civil Defence and Home Guards, Ministry of Home Affairs commendation disc leh certificate hlan an ni bawk.

Lunglei Fire Station hian March 10, 2023 khan ‘Subhash Chandra Bose Aapda Prabhandan Puraskar Awards 2023′ chu Prime Minister Narendra Modi kut atangin an dawng. Session of National Platform for Disaster Risk Reduction’ (NPDRR-2023) -semnaa Vigyan Bhawan, New Delhi-ah hlan an ni. Lunglei fire station hian cheng nuai 51 a dawn bakah fireman tin te hian certificate leh cheng nuai 5 an dawng bawk a ni. 

‘Subhash Chandra Bose Appda Prabhandan Puraskar Awards 2023’ dawng tur hian nominate 274 an awm a, Lunglei Fire Station leh Odissa Disaster Management Authority te chu ngaihhlut hlawh tak Indian National Award for Disaster Management dawng tur hian thlan an ni.