November 1883 a ni a, sumdawng Murdock Brown chu Royal Biscuit Factory-ah a lenglut a, he hmun hi India chhim tawpa state pakhat Kerala-a awm a ni a, a neitupa Mambally Bapu hnenah chuan Christmas atan cake a siam theih leh theih loh a zawt a..

Scot pachal hi Malabar leh tuipui kam vela Thakthing plantation nei a ni. Ani hian Britain atanga cake sample a rawn hawn chu Bapu hi a pe a, a siam dan te a hrilh bawk.

Bapu hian chhang leh biscuit siam chu a thiam a, hei hi tuna Myanmar ni ta, khatihlaia Burma-a biscuit factory pakhata atanga a zir a ni - mahse, cake erawh a la siam ngai lo. Mahse, Mr Brown-a sawi dan hmang leh cake sample a hmuh atanga chuan siam tumin thu a titlu ta a ni. 

Bapu chuan cake batter chu brandy a chawk lovin tualchhung zu cashew apple a siam chuan a chawk ta a ni, Brown hi chuan an bul lawk Mahe-a French colony-a brandy chu hmang turin a rawn. An siamchhuah tak erawh plum cake tui tak tualchhung hmanrua veka siam chu a ni ta a ni.

Brown hian Bapu-a cake siam chu an eichhin a, a hlim hle a, dozen tam tak siam turin a ti ta nghe nghe a ni.

Bapu tuchhuan Prakash Mambally chuan, "Hei hi India rama Christmas cake hmasaber siamchhuah dan chu a ni," tiin a sawi.

Hei hi official document atang chuan a dik ngei e, tih fiahna chua a awm miah lo, chutihrual chuan Mambally Bapu-a'n bakery bul a tan hi nghet takin Tellichery (tunah chuan Thalassery) -ah a takin an la kalpui a, India rama Christmas chanchin hmasa nen a inzawm tawh.

Mambally chuan, "Bapu hian British tui tih zawng chu Indian zingah a ti lar a, World War I hunlai pawh khan cake leh biscuit ram dangah pawh a thawnchhuak a ni," a ti.

Mambally chhungkua hian an pu bakery leh Christmas cake recipe lar tak chu an inhlan chhawk zel a, hmun hrang hranga an inzarpharh a, Thalassery-a mi tak hi Prakash Mambally chuan a enkawl mek a ni.