Aizawl; Mizoram Kohhran Hruaitute Committee (MKHC) Chairman Rev. Dr. Vanlalnghaka Ralte chuan kohhran thurin chungchanga inhnial chu insum a that thu leh thurin dang vuantute hmuhsit leh fiamthu thawh nana hman phei chu tih hauh loh tur a nih thu a sawi a. “Mi dangte rem tum leh inpumkhatna rilru put zel hi Lal Isua zirtirna a ni,” a ti bawk.

ZALEN-in a mi mal ngaihdan a zawhnaah Synod moderator ni bawk, Rev. Dr. Vanlalnghaka Ralte chuan kristiante zingah kohhran pawl hrang hrang a awmna chhan chu chhan dang te pawh a awm rualin Pathian thu (Bible thu zirtirna) hriatthiam dan leh kalpui duh dan inan loh vang a ni ber tih a sawi.

Kohhran chanchinah thurin chungchanga inhnialna a lo awm tawh thin tih sawi bawkin MKHC chairman chuan, “Hengte hian kohhran inpumkhatna aiin inthen darhna leh inepna tha lo a thlen  zel a, nghawng tha lo leh thisen chhuahna hial te pawh a lo thlen tawh thin,” a ti.

Hengte a nih avang hian thurin chungchanga inhnial chu insum a that thu te, thurin dang vuantute hmuhsit leh fiamthu thawh nana hman phei chu tih hauh loh tur a nih thu a sawi.

“Mahni kohhran theuhah kan mite kan thurin chiang taka kan zirtir hi a tha a, chumi rual chuan kohhran ziding pangngai dang te thurin leh inkaihhruaina inzahsak a pawimawh,” Rev. Dr. Vanlalnghaka chuan a ti bawk.

Social media lamah tunlaiin kohhran thurin leh rin dan chungchang-ah inhnialna hrang hrang a tam hle a, social media thenkhat, a bikin Facebook leh YouTube lamah tun thlengin thurin chungchang sawi leh ziak mai bakah inchotuahna anga ngaih theih tura inchhanna pawh hmuh tur a awm nual a, ram pum hmuh/hriat theih tura debate nei pawh tun hnaiah an lo awm tawh bawk.