Aizawl; Mizoramah nikum March 22, 2020 hnu lam a inkharkhip kalpui a nih atanga vawiin thlengin state pawn atanga nitin mamawh (Essential commodities) chawlut nasa leh hralh tam ber ber te chu Aizawl a hnamdang enkawl eichawp wholesale dawr te an ni.

ZALEN thudawn danin, tun dinhmun a Mizoram a sumdawng pawl lian ber ber te chu Mizoram Merchant Association (MIMA) leh Mizoram Distributors' Association (MIDA) te an ni a, heng pawl ah hian nitin eichawp zuar hnamdang sumdawng wholesale dawr lian neitute leh enkawltute an tel lo a, hetihlai hian heng hnamdang dawr te hi a bikin Buhfai, Tel, Alu, Dal leh Purun ah te Aizawl chawmtu ang a ngaih an nih hial bakah, an hnen atangin Aizawl pawn lam hmun hrang hrangah lakchhawn a ni thin.

Aizawl hmun hrang hrang-ah hnamdang enkawl eichawp dawr lian 10 bawr vel a awm tih hnamdang sumdawngte chuan an sawi a, bungrua an chawkluhna tam ber chu Silchar a nih thu leh Shillong atanga Alu an chawk luh thin thu ZALEN zawhna chhangin an sawi.

Heng hnamdang enkawl wholesale dawr atang hian Mizo sumdawng tam takin bungrua an la chhawng a, MIDA hnuai a awm Essential comodities zawrhna Mizo dawr lian engemawzah awm mah se, mipui nitin mamawh zualpui hralh chhuah kawng a inkharkhip hlawkpui ber ber te chu wholesale dawr nei hnamdang sumdawngte an ni.

Hnamdang dawrkai te chuan an bungraw chawkluh tam ber te chu Buhfai, Tel, Alu, Dal leh Purun a nih thu leh hengte hi inkharkhip chhunga mipui a an hralhchhuah tam ber a nih thu an sawi a, an inhralh dan leh inhralh zat erawh chiang takin an sawi thei lo.