Aizawl: Mizorama tlawmngai pawl lian ber Central Young Mizo Association (CYMA) general conference vawi 72-na, October 15-17, 2019 chhunga Chhurbura Run, N.Vanlaiphaia a neih turah ruahmanna engkim peih a ni.

Inkhawmpui hmang tur palaite hian naktip Thawhlehni hian N.Vanlaiphai an pan ang a, Thawhlehni zanah palai lawm inkhawm leh report ngaihthlak a ni ang. Nilaini zing dar 10:30-ah exhibition hawn a ni ang a, hemi zawh chawhma dar 11 atangin rorel inkhawm neih a ni ang a, rorel palaiten ro an rel chhung hian N.Vanlaiphai Community Hall-ah variety programme hman tur a ni.

Nilai zan dar 7-ah vantlang inkhawm neih a ni ang a, hemi zan hian Chief Minister Zoramthanga chu thusawi tura beisei a ni a, Chief Secretary Lalnunmawia Chuaungo tel tura beisei a ni bawk.

Ni 17.10.2019 (Ningani) dar 11:00 atanga chawhnu dar 3:00 inkarah hruaitu thlanna neih a ni dawn a, hemi chhung hian mipuiten Community hall-ah variety programme an lo hmang ang. Zanah vantlang inkhawm leh palai thlahna hun hman a ni dawn a, President thlan tharin thu a sawi bawk ang.