Covid-19 thawk thar leh mek zelah, khawvel hmun hrang hranga mite chu inkharkhip leh inkhuahkhirhna hnuaiah an khawsa leh tan ta mek a. Mi maktaduai tel, India atanga Argentina thlengin, invenna damdawi pek chak loh leh indaih lohna karah, thununna hnuaiah an kun thar leh mek.

India bikah a tuar na ber, Maharashtra-ah kartawp apianga hri leng danchah nana inkharkhip an puan chu nimin atang khan an kalpui tan.

Colombian khawpui, Bogota-a cheng mi maktaduai riat vel chu ina tawm tura tih an ni thar leh a. Hri leng thawh thumnain a nuai mek ramah hian khawpui lian paliah zan lam curfew puan a lo ni tawh a, mi maktaduai sarih vel zet zan lama chhuak thei lovin an awm.

Argentina-ah Zirtawpni zan atang khan zan curfew, zanlai atanga zing dar 6:00 thleng awh turin April 30 thleng an kalpui. Khawpui lian zualah chuan bar leh thingpui dawrte chu zan dar 11:00-ah an inkhar. Argentina leh Colombia-ah hian mi maktaduai 2.5 chuangin coronavirus an kai tawh.

France ram pawh khuahkhirhna hnuaiah an awm mek a. German sorkar pawhin hri inkai darh tihziaawm nan mihring chevel leh sumdawnna khar thentir a tum mek.

Italy-ah chuan tun kar atangin hri leng darhna hmunpui, Lombardy chu inkharkhip kalpui tur an ni a. Ram  bial dang pawh inkhuakhirh tur an awm nual.