Thawh chhuah nei lo, chawm hlawm state, tute emaw tawngkam takin ‘Delhi drip’ ringa nung ve mai kan ni a, kan dinhmun hi a chhuanawm lem lo khawp mai. Ei leh bar, sum leh pai dehchhuah kawnga ngelnghet zawk te mah an inren chuan keini phei chu nasa taka inrenchem leh zual tur kan ni.

Kan intodelh loh ang ai hian mamawh te hi kan ngah phian a, a ba thla pawha mi neih ang neih tum ve zel hi kan tam viau mai. Chhungkuaah pawh hian thawh chhuah nei lo apiang hi duh leh mamawh ngah, a tui tui hria, inren nachang hre si lo an ni duh viau mai. Thawh chhuah kan nei tam lo a ni pawhin inrenchem nachang tal hi hria i la, hma kan sawn phah ngei ang.

Kawng engkima intodelh lo kan nih avangin khawtlang, kohhran leh sawrkar ang pawha inrenchem hi kan tihmakmawh a ni. Sum thawhchhuah tam ai pawha pawimawh zawk chu awmze neia hmuh chhun hman thangkai thiam hi a ni. Mike Tysyon-a te meuh pawhin a vang lai chuan sum a la lut hnem a lawm. Mahse, awmze nei loin a hmang pur pur a, a tawpah lei ba tam tak neiin a tla chhe rup mai a nih kha.

Sawrkar pawh hi a inremchem zawng ni lo, a tla ran zawnga a kal zel chuan a tla chhe thei khawp mai. Khawvel ram ropui ni thin, finna lama khawvel hmahruaitu Greece meuh pawh kum 2015 chhoah khan namen loin sum leh paiah a tla chhia a, khawvel hriatah a mualpho a nih kha. Keini hi a kum telin kan state leiba a tam tual tual mai si a, kan la mualpho ve viau ang tih pawh hlauhawm tak a ni. Chuvangin, inrenchem hi a sawrkar ang pawha tih mak mawh a ni.

Inkhawmpuite hi kan uar em em mai a, kum tin sum tam tak sengin pandal kan sa a, tha leh zung, sum leh pai tam tak kan seng ral a, a tuk lawkah kan thiat leh mai si. Kan ram sum pai dinhmun hre rengin khawmpui te pawh hi tun aia hautak lo zawka kal pui theih nise a tha khawp ang. Intodelh leh sum leh paia ngelnghet tawh te chuan a tha ber ber, a changkang ber ber pawh lo hmang ang hmiang, keini hian a tha ber, a to ber, a changkang ber hi kan la tlin rih lo a ni. Sawrkar, kohhran leh tlawmngai pawl te hi a inrenchem zawnga kan kal a tha hle mai.

Inrenchem hi chhungkua atanga kan inzirtir a tha ber ang. Awm lohna room light tihthim nachang hriat te, tui ren thiam te, chaw thing paih fo ngai loa a tawk chauha chaw chum thiam te, ei bâng nawi nei tlem zawnga chet thiam te hi tihthanah nei ila, chhungkua atang hian thanhnanah nei tlat mai ila duhthusam a ni. Chawmhlawm state hian ei bâng nawi neih hnur fo mai hi a fel lo ve hrim hrim.

Tum khat pawh Tuikhuahtlang kohhran hian an hunpui ruaithehah ei bâng nawi an lo ngah deuh ni tur a ni, Pu HL Malsawma’n, “Ruai theh leh hunah chuan fatu chairman ka ni ang a, chawhtawlh khat chiah a bâng ang,” a ti. Mi changkang chuan ruai bangnawi vawmkhawm hnur maite hi ui nachang an hria a, tui liam pur pur mai te hi an ui a, awm lohna pindan an off thlip thlep a, ruaitheh nikhuaah pawh an thenga mi chu an ei zo kelh thin, an ei sen loh khawpa tam an suak ngai lo.

Inrenchem hi uikawm tihna a ni lo va, mi fing zia zawk a ni. A fing leh hausa apiang hian inremchen nachang an hria a, a nei lo apiang hi inren nachang hre lo, neih chhun hman mai awlsam kan ni duh khawp mai. Hman deuh khan sumdawng hausa Pu Bualhranga hian Durtlang Presbyterian Hospital Charity Fund atan cheng nuai tam fe a pe tawp mai a, a thilphalna a ropui ngawt mai. Pu Bualhranga hian duh nise chawlhni tin suit thar pawh a nei thei ang chu maw le. Mahse, heti chung hian tul loah pawisa a hmang ve huau huau lo ang tih ka ring. A kamis hak thin pakhat chu a nghawng a phuai deuh tawh a, keini takngial pawhin kan hluihlawn tawh tur a nih vei nen ani Pu Bualhranga chuan a nghawng thuina chu a phelh a, a pawn lam chu chhung lamah a let a, a thui tha leh a, rei tak a ha leh nia!

Kan intodelh lo a, kan sum lak luh a tlem a nih pawhin mamawh titlem ila, kawng engkimah inrenchem nachang hria ila, intodelh ni pawh a her chhuak ve mahna!