Aizawl: Mizo Students' Union Gen. Headquarters leh Shillong MSU tangkawpin a an buatsaih Inter State Mizo Students' Meet chu Ningani kalta zan khan NEHU Campus-ah hman zawh a ni ta a, a kharna hunah hian Sports & Youth Services Minister Robert Romawia Royte chu khuallian a ni.

Khuallian Robert Romawia Royte chuan zofa zirlaite inpumkhatna tura Inter-State Students' meet buatsaih a ni chu ropui a tih thu a sawi a. Sawrkar in Zofate inpumkhatna turin theihtawp a chhuah mek thu sawiin Mizoram state pawn leh ram pawna Zofate awmna hmun hrang hrangah Zofate inpumkhat leh zualna tur programme hlu tak hman a nih theih nan sawrkarin hma a lak mek thu a sawi bawk.

Khualzahawm NEC Adviser Rodingliani pawhin palai kalkhawmte chu an zirna kawnga an mahni tibuaitu leh an nuna an hmelma te hrechiang hmasa a do let turin a chah a, NEC atangin Mizoram Tourism tih changtlunna turin ruahmanna an siam tur thu a sawi bawk a ni.

MSU President Vanlalliana chuan palai kal khawmte chu ram leh hnam hmel an nihzia sawiin nungchang mawi tak neia, hnam dangte entawntlak a nung turin a chah a. Shillong khawpui a Mizo zirlai awm tawh thin te Mizoram tana chhenfakawm tak tak an lo chhuak tawh thin tih sawiin, chhunzawm zel turin a chah bawk.