Aizawl; Inthlan a hnai chho zel a, campaign boruak a sang hle hlawh. Hetihlai hian party te campaign dan phung erawh a la inang tlang rih lo hle niin a lang.

Rorellai MNF party chuan bial 40 a an candidate tur an la tifel kim lo nia hriat a nih laiin, congress MLA Palak bialtu KT. Rokhaw chu MNF ticket in a ding dawn. MNF hian party pum angin campaign boruak an la siam lutuk lo niin a lang a, hetihlai hian minister ten press conference neiin, sawrkar achievement puan chhuahna an nei mek. Minister zingah CM leh R. Lalzirliana te tih loh midang zawngin chu hun chu an hmang kim tawh.

Congress party pawhin bial 40 a an candidate turte official in la puang kim lo mahse, Mizoram hmun hrang hrangah campaign beihpui an thlak ngawrh hle tawh a, an candidate tur ten house to house campaign an neih mek bakah, uar takin street campaign an nei mek bawk.

ZPM lam pawhin tun dinhmun a campaign beihpui an thlakna langsar ber chu street campaign niin, an candidate turte pawhin house to house campaign an bei ngawrh hle a, an party hruaitu lawk te chu Mizoram hmun hrang hrangah party programme in an zinkual nasa hle tawh bawk.

Inthlan puan a la ni lo a, puan a nih hunah chuan Mizoram People Forum (MPF) lam te hriatpuina leh vilna hnuaiah party te an campaign a ngai tawh ang a. House to house campaign pawh inthlan puan hunah chuan khap a ni tawh ang. Chungte chu MPF leh party tin te inrawntlang a an thutlukna a ni.

MPF kaihhruaina a common platform neih chhoh tur pawhin party/candidate te dinhmun pawh a hril thui chho hle in a rinawm bawk.