November 2, 2022; Kum 2023 inthlanpui atan party hrang hrang ten beihpui an thlak chho mek a, thla liam ta October thla chhung a party lian 3, rorellai MNF, INC leh ZPM ten Aizawl press club kaltlang a thuchhuah an siam a tarlan a nih danin, ZPM chu mithar lawmlut tam ber an ni.

Rorellai MNF party chuan nakum inthlan lo awm tur pualin tunhnaiah programme lian tham siam nei rih lo mah se, hmun hrang hrangah block conference erawh an hmang chho mek thung. October thla chhung khan MNF party a lawmluh mithar 1,845 an nei a, chung zinga mi 592 te chu an president Zoramthanga lawmluh an ni.

Hetihlai hian congress party chuan an president thin, Lal Thanhawla a chawlh hnuah MPCC OB thar ten Mizoram district 11 an tlawh chhuak tawh a, chung a hun an hmanna ah October thla chhung khan an president Lalsawta chuan mithar 1,152 an party a lawmluh a nei. 

ZPM lam pawhin 'Kalphung Thar Vangpui Fehchhuah' an neih mek bakah an party hruaitu thenkhatte Mizoram hmun hrang hrangah party programme pawimawhah an zinchhuak nasa hle a, October thla chhung khan mithar 3,299 lawmluh an nei. ZPM party a mithar lawmluttu te hi a tlangpuiin an leader Lalduhoma leh an working chairman K. Sapdanga te an ni.

Rorellai MNF in kum 2018 inthlan dawn a an au hla ber 'SEDP chu an au hla ber a la ni chhunzawm zel a, Congress lamin, 'That loh theih lohna Bawm' 'Tang puihna' tih te an sawi uar a, September ni 30, 2022 khan an manifesto No. 1 an lo tlangzarh tawh bawk. ZPM lam chuan 'Kalphung thar, mipui sawrkar' tih lam hawi uar takin an sawi chho mek zel bawk.