Aizawl September 24, 2023 : Mizoram Election Department chuan Mizoram MLA inthlan tur chungchangah sawrkar laipui leh Election Commission of India (ECI) atangin tun hnaiah thudawn an nei lo a, kumin kum tawpa inthlanpui nei turin an inbuatsaih mek zel.

Sawrkar laipuia BJP kaihhruaiin Lok Sabha leh state hrang hrangte a ruala inthlan (one nation, one election) a nih theihna tura hma an lak mek chungchang leh inthlana hmeichhiate tana seat reservation chungchangah Mizoram Election Department chuan thu dawn an nei lo tih department hotute chuan ZALEN an hrilh.

Election department hotute chuan ECI kalphung angin Mizoram MLA inthlan hnuhnung ber, kum 2018-a inthlan hun, November 28-a inthlang tur angin, kumin May thla atang khan ngawrh takin an inbuatsaih mek tih an sawi. 

Kumin hi MLA inthlan kum a ni a, kum 2018 zulzuia inthlan kalpui a nih dawn chuan inthlan puan hun a hnai tawh. 

Kum 2018 MLA inthlan hun kha October 6 (Inrinni)-ah puan niin, hemi zulzuia kal a nih chuan inthlan puan nan thla chanve vel bak hun a awm tawh lo.

Inthlan hnuhnung berah khan November 28, 2018 (Nilaini)-ah vote thlak niin December 11, 2018 (Thawhlehni)-ah vote chhiar a ni.