Aizawl: Chief Electoral Officer Ashish Kundra chuan Mizoram MP leh MLA by election lo awm turah inthlanna muanawm leh felfai neih theih a beiseiawm tih a sawi.
Nimin tlai khan Press mite kawmin CEO chuan an ngenna ngai pawimawha NGO ten inthlan boycott an tumna an thulh avangin lawmawm a tih thu a sawi a. Tunhnaiah Mizoram khawpui hrang hrangte a tlawh tih sawiin inthlang tura official-te inbuatsaihna chu lungawithlak a tih thu a sawi a. Inthlana duty turte tan tum hnih training buatsaih tawh a ni tih sawiin a tum thumna atan naktuk Thawhtanni hian neih leh a ni dawn tih a sawi a. Inthlanna a hman tur EVM te pawh endik ni tawhin hman theih turin peih an ni tawh tih a sawi.
Bru-te tan Kanhmuna vote thlakna tur polling station chu tunhnaia ruah leh thli thawkin a tichhia tih sawiin vote an thlakna tur hi Catholic school-ah siam a ni tih a sawi bawk.