Aizawl: Mizoram Chief Secretary Lalnunmawia Chuau-ngo chuan, "India ram State dangah Election dawn hnaia harsatna thleng ang hi Mizoram ah chuan a awm ngai meuh lo a; kumin ah pawh hian mipuite tawiawmna avangin inthlan muanawm tak kan beisei a ni," a ti.
Awithangpa Group YMA Conference, Ningani zana Kawnpui-a neih ah thu sawiin Chief Secretary chuan India ram inthlanpui leh MLA Bye Election neih tura lungawi lohna lantir tum mek NGO Coordination ten sawrkar ngenna zaha an thil tum an sut avangin lawmawm a tih thu a sawi a. Mizoram chu Pathian hruaina dawng thin State anih avangin hun harsa kan tawh dawn avangin Pathian hruaina a lo thleng thin niin a sawi.
Chief Secretary chuan YMA kumpuan chungchang sawiin, "Ram leh hnam humhalh a ngai anih chuan tibuaitu an awm mek tihna a ni a. State pawn atanga min rawn tibuaitu leh State chhunga tichhetu an awm thei a. Ram pawn lam atanga rawn tihbuai hi chu ven a harsa lo; mahse ram chhunga tichhetu hi beih a harsa a; ven ngun ber tur a ni," a ti a. "Thawh tur awm apiang hreh lova kan thawh a ngai tawh a; kan thawh peih loh rawn thawktu te hian hun a lo rei deuh in min eichhe thei zel a ni," a ti bawk.
Awithangpa Group-ah hian Branch 13 an awm a ni.