Aizawl May 19, 2023 : Vawiin khan Congress Bhavan, Aizawl-ah Friday Political Session neih a ni a, Ukil pali lawmluh hun an hmang a, he huna thusawitu Congress Party President Lalsawta chuan an chhiat lai bera lut Ukil te chungah lawmthu a sawi a, Inthlana pawisa chakna hneh ngei an tum thu leh Candidate te sum senso sang lutuk tihtawp an tum thu a sawi bawk.

Congress Party President Lalsawta chuan, "Congress Party chhiat lai bera dawmkang tura tha thawh inhuama lo lut Ukil thiam tak tak kan nei thar hi a lawmawm takzet a. India ram politics dinhmun hrethiamtu leh sakhaw zalenna duh tute an lo luh zel ka beisei tlat a ni," a ti.

Lalsawta chuan, "Chakma District inthlanah pawisa chakna kan buan hneh lo a, sawrkarna kan siam zo ta rih lo a. Vawiinah erawh candidate pakhat boral avanga inthlan buatsaih that lehna bialah kan chak ve thung a, a ropui ka ti hle a, Pathian hnathawh ni ngeiin ka hria. Mizoram mipuite nena tang tlangin Mizoram hmun dangah hi chuan pawisa chakna hi kan hneh theih tawh ngei ka beisei, Mizoram mipuite hi KS anga lei theih an ni tlat lo! Inthlana pawisa chakna hi Mizoram mipuite, Kohhran mipuite nen tang tlangin kan do dawn a. Inthlanna a Candidate-ten an senso, mipui sum hmanga rulh leh an tum thin hi tih tawp kan tum dawn. Sawrkar Tha din tumin, mi rethei zawkte tan Tang Puihna kan buatsaih a ni" a ti.

Congress President chuan, "Pathian hruainain kan kal zel ang a. Kan hma lawka inthlan kan hmachhawn turah hian keini chuan Lalpa lam kan hawi a, dilna chang pawh kan hriat miah loh Ukil thiam tak tak 4 min petu hian midang pawh min pek leh zel ka ring tlat. A duh phawt chuan sawrkarna min pek pawh hi A tan thil harsa a ni lo tih kan chiang a ni. Congress Party mite chu khawi hmunah pawh tlawm takin, Pathian hre rengin mipui tan i ding zel ang u," a ti.

MPCC Treasurer thar Dr. Lalmalsawma Nghaka pawhin thu sawiin, "Kan hruaitute’n ram leh hnam tana thawk turin MPYCC-ah min chher hriam a, thil tam tak ka zir chhuak. Congress Party hi Kristian pachal din a nih angin Congress-ah chuan Pathian hi No. 1 a nih zel a ngai. Hmasawnna leh Development duh a, awh vang ngawtin ring lo mite tawktarh apiang kan pawm ve zel a rem lo. Ramin a mamawh chu mi hausa leh milar te an ni kher lo a, zirna lama sang tak an ni hran lo. Mi dik, mi rinawm leh thil tha ti tura an mahni thlangtu mipuite tana ding nghet ngamte hi a ni ramin a mamawh chu ni" a ti.