Aizawl: Aizawl khawpui chhungah traffic tawt lutuk avangin November 2017 atang khan lirthei intlanchhawktir a ni a, July 2019 atang khan lirthei tlan dan hi thlak danglam leh niin a leta tam dintir an ni. Lirthei tlan dan tihdanglam avang hian lirthei, a bikin two wheeler hi a pung viau tih Transport Department hnuaia Aizawl District Urban Office atanga ziaka ZALEN in RTI a dil chhuah atang in a lang. Traffic Police lam chuan lirthei chu pung chho zel tur a nih thu an sawi.

Kum nga kalta chhung, March 31, 2019 thleng khan Aizawl DTO Urban Office-ah lirthei 52,593 ziah luh a ni a, heng zinga 40,698-te hi two-wheeler an ni. Intlanchhawk hman hnuah hian heng ke pahnih nei lirthei ziah luh hi a sang chak hle a, lirthei dang erawh intlanchhawk hnu leh a hma hian a danglamna a tam teh-chiam lo.

Kum 2015-16 khan two-wheeler hi 7396 ziah luh a ni a, a hma kum aiin 470-in ziah luh a tam. 2016-17 khan 8739 zet ziahluh a ni a, a hma kum aiin 1343 zetin a pung chho. 2017-18 ah phei chuan a punna hi a sang zual a, sawrkar kum liamta lamah phei kha chuan ke pahnih nei lirthei punna hi a sang zual a, lirthei hi pung chho zel turah Traffic Police lam chuan an ngai hmiah.

Traffic Police Addl. Superintendent of Police, Zoramthanga Pautu chuan, “Hei hi chu khawpui thanglai ken a ni a, lirthei hi chu a pung zel lo thei lo,” tiin ZALEN a hrilh.

Thla 3 kalta chhung khan DTO Aizawl chuan lirthei thar 3591 an ziaklut a, heng zinga 2357 chu two wheeler an ni.

Lirthei a pung chak kan tih rual hian ke pali nei chi lam erawh hi chu a pung chak han tih tur a ni lem lo a, a nazawnga khawpuia lut thei lo, bungraw phur chiho phei chu Aizawl District Urban Office-ah hian ziah luh a pung lem lo.

Car kan tih ho ang chi, Light Motor Vehicle (LMV) erawh a kum telin a punna a sang hret hret a, kum nga kalta chhung khan Maxi Cab (Sumo) ho ang chi phei chu a punna a tam lo hle. Two-wheeler bikah erawh kum nga kalta chhunga a punna hi a za telin a sang chho.

Lirthei intlanchhawk dan hmasaah khan calender a ni tawpna digit hmangin intlanchhawktir a ni a, ni 1, ni 11 leh ni 21-ah te chuan motor nambar tawpa pakhat awm te tlan phal sak an ni lo a, hetiang zel hian lirthei nambar tawpna azir zelin intlanchhawk a ni thin. Hemi hun chhung hian, MZ-01 ang china teh chuan Aizawl khawpui chhung luh phal loh hi ni tin 17,00 awm ang a ni a, district dang motor leh state dang registration leh ZRM leh ZRA la awm tlem azawng tela teh phei chuan khawpui chhung luh phal loh lirthei hi hetih lai pawh hian a lo berah 18,000 chung zet an ni.

He kalphung hi a tir lamah chuan awmzia a nei viau a ngaih a ni a, mahse, kum khat leh a chanve zet hman a nih hnuah awmzia nei tawk lova ngaiin, July 2019 atang khan intlanchhawk dan thar hman tan leh a ni, a hmaa ding thin let dintir an ni a, ni tina lirthei Aizawl khawpui chhunga tlan phal loh chu 36,000 chung zet an an tling ta. Traffic jam hi ziaawm chuang lovah mi tam takin an puh a, Traffic Police lam chuan awmzia thui tak awmah an ngai.

Aizawl khawpui chhunga traffic jam chungchangah hian sawi a tam a, ziaawm lem lo anga sawi pawh a tam, a hma anga zavaia tlan mai duh pawl te pawh an awm. Hemi chungchangah hian Aizawl Traffic Police Addl. Superentindent of Police, Zoramthanga Pautu chuan, “Nau tah belh deuh an awm a, thenawmte sawi hlawh pawh a ni hial. An ziaawm deuhin an lan changin, thenawm pa chuan, ‘Tunlai in-nau chu a va fel ve,’ a ti a; mahse, chutiang chu a awmtu tan chuan a ni lo,” ti a, entirna siamin, “Lirthei che vel enkawltu (awmtu) kan ni a, kan hre chiang, hetianga tlan dan thar kan hman leh hnu hian thil hi a awlsam phah tih hi kan tawn hriat a ni. Traffic hi khawpui chhung lun laiah chuan a ‘jam’ lo thei lo, hei hi chu khawpui ken a ni. Tunah hi chuan traffic jam hi a nghet tlut tawh lo,” tiin ZALEN a hrilh.