Aizawl : I&PR Minister Lalruatkima chuan nimin khan Hualngohmun leh Melriat inramrina bulah Montfort Bothers leh Ursuline Francescan Sisters te enkawl, Monfort Academy leh Monfort School Building thar a hawng.
Montfort Academy building thar hawngtu, I&PR Minister Lalruatkima chuan, "Zirtirna hi ram leh hnam hmasawnna lungphum a nih avangin ngaihpawimawh loh a thiang lo a ni," a ti a. Mihring tungchhova kal zawng zawngte tan piantirh atanga thihni a thlen hma chu inzir reng a ngai, a ti.
I&PR Minister chuan, "Tuna kan dinhmun en chuan khua leh tui te tana pawimawh, hna pawimawh bik kan tih DC, SP leh hnasang zawkah te chuan All India Service kan neih tawh meuh loh avangin hnamdangte heng hna pawimawh te luahin an thu tan ta a. Hei hi ram leh hnam humhalhna kawngah thil pawi tak a ni thei a. Khawtlang leh kohhran rawngbawlna huangah te pawh, kan mithiam neih, khalhfal phu te chu All India Services leh hnasang zawk hmu thei tura kan beisei a nih chuan chung mite chu kan awl thiam a hun tawh.", a ti bawk.
Monfort Academy leh Monfort School building thar Pathian hnena hlanna leh hawnna pual hian sikul chhungah cultural programme tawi buatsaih a ni a. Bro.Jose Thekkedam, Principal, St Paul's HSS & Monfort Academy chuan programme a kaihruai a. Cultural item hrang hrang bakah khualzahawm Most Rev. Stephen Rotluanga, Bishop of Aizawl, Rev. Bro. MK. Devassy, Provincial Superior, Montfort Brothers leh khawtlang hruaitute thu sawi ngaihthlak a ni bawk. Kum 2009 a din, Montfort Academy hi CBSE hnuai a nih laiin kum 1997 a din, Monfort School chu MBSE hnuaiah a awm thung.