US-in an thah champha kum linaah chiah Iranian general Qasem Soleimani-a thlan bula bomb pahnih puakah mi 103 vel an thi niin Iran-a sorkar chanchinbu chuan a tar lang.

Sorkar chanchinbu, Irib chuan an ram chhim lam Kerman khawpuia Saheb al-Zaman mosque bula bomb puakah hian mi thahnem takin hliam an tuar bawk niin an tar lang.

Kerman-a deputy governor chuan ‘mi firfiak beihna’ niin a sawi tih a tar lang bawk.

Video thehdarhah chuan khawlaiah ruang a let rum a, ambulance-ten hmanhmawh taka a hmun an pan lai a lang.

Bomb puak hi tute hi nge hriat a la ni lo va, eng pawl mahin an tihah an la chhal lo bawk.

Hetih lai hian Arab inla hrang pawl, Islamic State (IS) leh Sunni jihadist pawl dang dangte chuan tun hnaiah Iran-a venhim hna thawktu leh Shia hmun thianghlim beihna thleng thinte chu an tihah an lo chhal tawh thin.

Soleimani-a hi Iran-ah chuan Supreme Leader, Ayatollah Ali Khamenei-a dawta thiltithei ber a ni a, kum 2020 khan US-in an ram thenawm, Iraq-ah drone hmangin an that a ni.

Nilainia thil thleng hi Israli-ten Lebanon-a drone hmanga Iran-in a thlawp Palestinian pawl, Hamas-a an deputy leader an thah avanga boruak a tan lai taka thleng a ni.

Sorkar TV-in video a tihchhuahah chuan general-te khua, Kerman hmar lam daia a thlan bula mi tam tak an pun khawm lai takin bomb pahnih hi a puak.

Iranian chanchinbute chuan a puak hmasa zawk hi chawhnu dar 2:50 (India-a tlai dar 5:50)-ah Saheb al-Zaman mosque-a Garden of Martyrs cemetery atanga metre 700 vela hlaah a puak niin an sawi.

A hnu minute 15 velah thlanmual atanga km khat vela hlaah a dang a puang zui leh.

Revolutionary Guards hnuaia mi, Tasnim news agency chuan ‘bag pahniha dah bomb’ a puak a, hei hi ‘remote control hmangin’ tihpuah niin a tar lang.

“Thlanmual lam pana kan kal laiin kan hnunga car chu a ding a, bomb puakin a thlawh bawlhhlawh bawm a lo leng nghal chuai chuai a ni,” tiin a hmutu pakhat thu sawi chu Isna news agency-in a tar lang bawk.

“Thil puak ri chauh kan hria a, mi an lo tla nghal sup sup a ni,” a ti.

Sorkar chanchinbu chuan tual chhung emergency services department-in mi 103 an thih thu leh mi 141-in hliam an tuar niin an sawi tih a tar lang a. Hliam tuar thenkhat chu an na hle bawk.

Iranian Red Crescent chuan a puak hmasaa thleng hmasa zinga damdawi thiam pakhat chu a puak hnuhnungin a fuh ve avangin a thi tel niin an sawi.

Video-ah chuan Soleimani-a thlan chu engmah a chhe lo niin a lang.

Revolutionary Guards hnuaia ram pawna beihpui thlak thin, Quds Force commander a nih lai khan Soleimani hi an kalphung duangtu ber a ni thin.

Quds Force a enkawl lai hian a kaihruai a, sum hmuhna te, ralthuam te, mi chhui leh an thawhpui sorkar leh pawl dang, Hamas leh Hezbollah te pawh telin, puih leh ralthuam pek dan zawng zawngah a hma latu a ni.

Hetih hun laia US President Donald Trump-a chuan Soleimani-a hi ‘khawvel khawi hmunah pawh firfiak No. 1’ tiin a sawi a, kum 2020 khan that tura thupek a chhuah a ni.