DOWNLOAD OUR APP

Read latest news on your phone
app-store
ISRAEL-HAMAS INDO: Gaza-in tuialhthei, damdawi leh ei tur a nghei thuai dawn
Oct 10, 2023

Israel-in Hamas-ten an beihna an chhan let mek zel karah Gaza Strip chu mihring mamawh lak luhna tihtawp a nih chuan tun atanga rei lo têah mihring khawsakna atana hmun khirh leh hautak tak a ni thuai dawn tih thuneituten an sawi.

Thawhtanni khan Israel chuan Gaza Strip hi ‘thapui thawha lak vek’ an tum thu puangin electricity, chaw, tuialhthei leh tui an lakna pawh an titawp (cut off) dawn tih an sawi bawk.

Mi chengte chuan Inrinni atang khan puihna engmah an la dawng lo tih an sawi hlawm.

Israeli-ten an chhan letnaa thlawhna a\anga an kahna avangin an khawlai chu a reh hle a, in an kah chhiat hnuhma erawh a tam hle thung tih BBC chuan a tar lang.

Israel-in a kahna avang hian mi 700 dawn thi an awm tawh a, mi sang chuangin hliam an tuar bawk.

Mihring maktaduai 2.3 chuang cheng zinga 80% vel zet hi tun hma atang tawha Israel nen an inkar a that loh avanga mi tanpuina ringa nung an ni.

Hamas helho chuan mi puihna ring ringawt an ni lo niin inchhal mah se Israel hian an chung boruak leh vaukam hrul a thunun a, ramri kâna bungraw phurh luh pawh a khuahkhirh vek bawk.

An thenawm, Egypt pawhin Gaza nena an inrina chu tu nge paltlang thei tih khauh takin a khuahkhirh bawk.

Inrinni tuka rocket hmanga Israel an kah vak hnuah Tel Aviv chuan Gaza luh a khap nghal hmiah a, ei tur leh damdawi pawh kaltlangtir a phal rih lo.

UN secretary-general thupuangtu, Stéphane Dujarric damdawi ina thawk mi eng emaw zat thi leh hliam zingah an tel tawh a, medical centre pasarih vel kah chhiat a ni bawk niin a sawi.

Hetih lai hian mi tam tak chu electricity leh internet nei lovin an awm mek a, ei tur leh tui pawh an tlachham thuai dawn bawk.

“Tui, bawlhhlawh sawngbawlna leh hriselna lam hmun tihchhiat hi mi 4,00,000 velin an tuar tawh,” tiin Dujarric chuan a sawi.

“Electricity atan Gaza Power Plant chauh an innghahna a ni tawh a, hei pawh rei lo têah a tuialhthei a zo mai dawn,” a ti.

World Food Programme-in baihvaia awm Palestinian 1,00,000 vel hnenah ei tur a pek lai chu indona a chhuah hnuah hian a let riat vel zetin an pung dawn niin a sawi.

Israel-in an châk lakluhna a khuahkhirh hma pawh hian Gaza-a cheng tam tak hian ei tur kham an nei mang lo va, an chet velna khuakhirh sa niin leh tui an dah khawlna pawh an kham lo bawk.

United Nations’ Palestinian Refugee Agency (UNRWA) thupuangtu, Juliet Touma chuan Gaza-a mipuite chu an thil tawn mek hian ‘a tihlau’ tih a sawi a, an himna bakah an fate leh an chhungte an ngaihtuah tak zet tih a sawi bawk.

Thawhtanni khan Israel Defence Minister Yoav Gallant chuan Gaza Strip hi ‘a zavaiin an la dawn’ tih a puang.

“Electricity, ei tur, tui, gas - a vaiin khar a ni,” tiin a sawi a, “Ramsa kan bei a, an chet dan ang zelin kan che ang,” a ti.

A hnu lawkah Israeli infrastructure minister chuan Gaza-a tui lak luhna chu titawp turin thu a pe zui a, “Thil kal tawha mite chu nakin zel atan engmah a ni lo,” a ti.

Hemi hma lawk hian Palestinian health ministry chuan Israel chet dan avangin an damdawi inten damdawi, damdawi in mamawh dang leh tuialhthei an tlakchham thu a puang.

Ram dangte chu Israel hnenah ‘power line tinung leh tura’ nawr turin a ti a, rikruma mamawh damdawi, tuialhthei leh power generator an mamawh thu a sawi bawk.

Israel hian Inrinni tuka Gaza atanga Hamas helhovin rocket-a an kah bakah luhchilha an ram an beih chiam chu thlawhna hmanga kapin a chhang let nasa hle a. Pathianni zana a kah phei chu kum tam tak chhunga Gaza-in beih a tawh nasat ber a tling.

An kah hmun thenkhat hi Gaza kahwchhak lam, an inrina lai vel a ni a, heng lai vel hi Inrinnia Hamas-hovin an kahna hmun kha a ni a. Israel hian chhut chhiat vek an tum niin a lang.

Mi thenkhat chuan Israel hian ramri hnaihah hian laipui pawh a hmang tel niin an sawi.

Israel chuan Gaza a kah hian Hamas-ho a bitum niin a insawi a; mahse, mi thenkhat chuan civil mite pawh a fuh nual niin an sawi.

Palestinian Ministry of Foreign Affairs pawhin Gaza-a refugee camp pahnih - Al-Shati (Beach camp an tih bawk) leh Jabalia camp an tihte chu Israeli hian an kap fuh niin an sawi a, thi leh hliam pawh an awm teuh niin an sawi.

Jabalia atanga onine-a video thehdarhah chuan mi an chiai hmel hle a, ruang laksawn lai leh thisen leh vutin a bawh vek mipa pakhat a lang bawk.

Foreign ministry pawhin thlawhna atanga kah hian Gaza-a UN sikul, naupang leh kum upa tela mi za chuang an awmna pawh a fuh niin a sawi.

UN pawhin sikul hi kah fuh a nih thu a sawi a, nasa takin a chhia a, thi erawh an awm lo.

Mosque leh chenna in pawh a fuh nual a. According to Associated Press chuan Gaza chhim lam, Rafah-ah chuan chhungkaw pakhata mi 19 zet an thi niin a tar lang.

UN chuan Gaza-ah hian baihvaiin mi 1,23,538 an awm niin an sawi a, a tam ber hi ‘hlau, himna duh leh an chenna in chhia’ an nih thu a sawi.

Office for the Coordination of Humanitarian Affairs (OCHA) chuan mi 73,000 zet sikul hrang hrangah an awm mek thu a puang.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh