Manipur-a tribal pawl hrang hrang inzawm khawmna, Indigenous Tribal Leaders’ Forum (ITLF) aiawhte leh Union Home Minister Amit Shah te inbia chuan tribal hruaitute duh angin an mi thite vuina hmun thu-ah erawh inremna mumal an siam thei rih lo.

Nilaini tlaia Delhi-a Shah leh ITLF hruaitute inbiaknaah hian hmarchhak state-a chi leh chi inkara buaina chhuak meka tribal mi thite a hlawma phum chungchang leh Manipura muanna a awm zel theihna tur thil hrang hrang an sawi.

Tribal-ho hian Inrinni khan an mite hi Churachandpur leh Bishnupur district inrina hmunah vui an lo tum tawh a, sorkar laipui ngenna avangin thulh a ni a. Invui an tumna hmun hi Manipur sorkar ram, industry department hnuaia sericulture farm a ni.

Shah hnenah pawh hian he hmun hi an mite phumna atan pek theih ni se an duh thu an thlen nawn leh a; mahse, union minister hian buaina chhuah tamna lai a ni a, Churachandpur bawrhsap nena inrawnin hmun dang zawng zawk turin a lo ngen a. ITLP aiawhte pawh hian an mite rawn chunga hmun dang an dap tur thu leh a rang thei anga thu tihtluk an tum thu an hrilh.

Tlangram district-a cheng tribal-te hian an him zawkna tur pawh Shah hi an sawipui a, union minister hian central force tam zawk dah luh belh a tiam a. State sorkar hnuaia venhim hna thawktute chu state thuhnuaiah awmin central force-te hi tlangram bika chetla tura tih turin a ti bawk.

May 3 atanga Meitei nena an intihbuai tawhna thi, Imphal-a an ruang la awm mekte pawh an khua theuh thlenpui an nih theih nan leh tute nge an nih tih pawh finfiah a nih theih nana hma la turin an inrem bawk.

Churachandpur, Kangpokpi leh Moreh huam chhunga awmte tan an duh hmun an pan theih nan helicopter service-tir pawh sorkar laipui hian a tiam.

Buaina avanga tlangrama cheng zirlai tam takte zirna khaihlak chungchang pawh sawi niin tlangrama college-a an inziah luh theih dan tur dap te, a tul a nih chuan state pawn lam university-a an kal chhunzawm theih dan tur dap bakah Churachandpur leh Kangpokpi-ah Manipur University-in zirna in (student facilitation centre) hawn dan dap turin an ti bawk.

Tlangrama lung ina tang mekte dinhmun pawh inbiaknaah hian sawi niin sorkar laipuiin an dinhmun ngun taka enin Churachandpur-ah a rang thei ang bera Justice Lamba Inquiry Commission pisa hran din nghal turin an inti.

ITLP hruaitute hi Shah hian Inrinni khan Delhi-a inbiakpuiah a sawm a, anni hian Mizoram Chief Minister Zoramthanga rawnin ani hian inbiak tha a tihpui angin an kal ta a ni.

Tribal pawl aiawhte hi mi pali niin Churachandpur atanga hnai tê, km 80 vel chauh, Imphal pan mai lovin lirtheiin km 350 chuanga hla, Aizawl an pan a, heta tang hian Delhi an pan leh chauh a ni.

Hmarchhak state-ah hian tlangram district hrang hranga cheng, tribal Kuki leh Imphal phaikuama cheng Meitei intihbuaina hian thla thum chuang a awh tawh.

Kuki chen tamna, Churachandpur-a tribal-ten Meitei-in scheduled tribe (ST) status neih an dilna duh lohna lantira kawng zawh liantham an huaihawt atangin buaina hi a chhuak a. State pum awh nghalin mi sang tam tak baihvaiin an awm phah mek a, chenna in leh sakhaw hmunte an inhalsak a. Thla thum liam ta chhung hian mi 170 vel thi an awm tawh bawk.