Aizawl October 21, 2022 : Vawiin khan Serchhip District Hospital Building thar sakna tur chungchangah Joint Action Committee on Serchhip District Hospital Site te huaihawtin Serchhip khawchhunga Village Council, YMA, MHIP, MUP Branch leh Welfare tin atanga pawl aiawh pahnih theuh te chu Serchhip Kawnpui VC Hall ah Joint Meeting an nei a, JAC ten PIL file an tum chu VC leh NGO te hian an thlawp.

Kalkhawm te hian resolution an siam a, Joint Action Committee on Serchhip District Hospital Site ten a hmun ngaia Serchhip District Hospital sak a nih ngei theihna atana an hmalakna leh tun dinhmuna Guwahati High Court a PIL file an tum hi vawiin 21st Oct. 2022 Fri. 1:00pm a Serchhip khawchhunga VC hrang hrang, YMA, MHIP, MUP Branch hrang hrang leh Welfare Comtt. hrang hrang kalkhawm te chuan a tha kan tiin a tawp thlengin kan thlawp tlat dawn a ni, tiin, Guwahati High Court a PIL File na atan hian a tuldan a zirin khawtlang huapin thawhlawm khawn nise an ti bawk.

Power Grid Corporation of India (Ltd) CSR Fund atanga Serchhip District Hospital sakna tur atana Cheng Vaibelchhe 21 crores hmuh chu Serchhip Dist. NGO Co-Ordination Comtt.(NGOCC) ten Bukpui a sak an rawt.. Septtember 26, 2022-a Serchhip DC hova Joint Action Committee on Serchhip District Hospital Site leh Serchhip Dist. NGO Co-Ordination Comtt. Joint Meeting ah JAC ten Detailed Project Report(DPR) leh May 27, 2022-a Chief Minister hova Power Grid Corporation of India Ltd. leh Health Deptt. hotu ten Memorandum of Understanding an ziah ah a hmun ngaia sak tura engkim ruahman a ni tih an sawifiah hnu ah NGOCC lam te hian Bukpui chu Hospital sakna tura an duhna ni mah se, sawrkar thutlukna apiang an pawm theih tur thu sawiin thuchhuah intawm an lo siam tawh a ni.

Mizoram sawrkarin Serchhip Dist. Hospital sakna tura thutlukna a la loh avangin October 19, 2022 a JAC te thukhawm chuan Guwahati High Court ah PIL thehluh an rel a, chumi chungchang hi vawiin October 21, 2022 hian Serchhip Kawnpui Village Council Hall ah Serchhip khawchhunga VC  leh NGO aiawh te Joint Meeting neiin PIL file chu a hun tawh an ti a, kalkhawm te hian ban pharin PIL file an duh thu an nemnghet a ni.