ZALEN August 27, 2023 : Mizoramah jail 10 a awm a, chunga tang awm thei zat tura bituk chu mi 1,386 an ni a, August 15, 2023 khan jail tang 2,111 an awm thung a. Tang awm thei zat tura bituk aiin mi 725-in an tam.

Mizorama jail hrang hranga tang 2,111 zinga 1,747 chu mipa an ni a, mi 364 chu hmeichhia an ni a. Tang awm tamna ber, Central Jail-ah chuan mi 920 an tang a, tang awm thei zat tur bituk chu 438 niin, tang awm thei zat aia 482-a tam (a let aia tam) an tang a ni.

Siaha District Jail chu mi 92 tan theihna tura ruahman niin, tang awm thei zat tlemna ber a ni a, tang mi 93 an awm mek. 

Aizawla jail pathum - Central Jail, Women’s Jail leh District Jail-ah te, Lunglei District Jail leh Champhai District Jail-ah te tang awm thei zat bituk aia tam daih an tang vek a, jail dang zawngah chuan tang awm thei zat aia tlem an tang mek thung.

Mizorama jail 10-a tang mek zingah thubuai la chin fel loh (ngaihtuah mek) 1,443 awmin mipa 1,131 leh hmeichhia 312 an ni a, thiam loh chantir (convict) tawh mi 582 an awm.

Jail 10-a tang mek zinga mi 50, mipa 49 leh hmeichhia pakhat chu dam chhunga tang tura an chungthu rel tawh an ni a, mi 336 (mipa 307 leh hmeichhia 29)-te chu hrehawm taka táng (rigorous imprisonment) tura hrem an ni a. Simple imprisonment (pangngai taka tang tur) mi 246 (mipa 236 leh hmeichhia 12) an awm bawk.