July 12, 2022; July ni 9, 2022, inrinni chhun a Central jail atanga tlan chhuak, Isak Lalremruata (28) s/o Lawmzuala, Kananthar, Mamit district leh Zohmangaiha (19) s/o C. Vanlalhruaia, Lunglei Ramthar vengte chu ngawrh taka zawn chhunzawm zel an ni.

Central jail thawktute'n ZALEN an hrilh danin, inrinni khan ministry pakhat chuan central jail ah rawngbawlna an nei a, chawhma inkhawm ban, dar 11:30 a inchhiarna an neihah an la kim a, chhun dar 12:30 a thingpui an inzawhah chawhnu inkhawm turin biakin lam an pankhawm leh a, biakin a inkhawm peihlo, ward lama awm engemawzah an awm bawk.

July ni 9, inrinni khan mitang 686 an awm a, tang tlanchhuak mi 2 te hi tlai chawei dawn ah an kim lo tih hriat niin, an tlanchhuah hi chawhnu lam dar 1 leh dar 2 inkar vel a nih rin a ni a, biakin a inkhawm neih laiin an relhru nia rin a ni. An relhrukna lai chiang taka hriat theih a la ni lo. Tang tlanchhuak mi 2 te hi ward hran a awm an ni a, thian dang pawh kawm lem lo a, inkawp deuh chawt nia hriat an ni.

Tang tlanchhuak an awm tih hriat a nih veleh, Aizawl khawpui chhung a sumo counter hrang hrangte chu information pek nghal an nih bakah, endik nghal vek a ni a, Mizoram khaw hrang hrang a police station te pawh information pek chhuah nghal vek an ni bawk.

He thil thleng chungchangah hian prison department hotute chuan chuan police ah thubuai an thehlut tawh a, Aizawl DC, SP leh Court lam te pawh thil thlen dan hrilhriat an ni tawh bawk.

Tang tlan chhuak mi 2 te hi hmeichhe kumtling lo khawih/pawngsual vanga tang an ni a, an tlan chhuah lai hian Isak Lalremruata hian a ban veilamah leh a pumah ser a nei a, Zohmangaiha hian a ban veilamah tattoo leh a hmui hnuaiah khuavang a nei. Anmahni hmu leh an awmna chin hriate chu Special Superintendent mobile no. 7085929432 leh Jailer mobile no. 9862306783 ahte hriattir tura ngen an ni.