ZALEN July 8, 2024; July ni 6, 2024, Inrinni chawhnu lama Serchhip District jail aṭanga tlan chhuak Myanmar mi 2 a pakhat zawk Lalnunnema (31) s/o Lalkima (L), Thántlang, Myanmar chu tukin khan Serchhip hmar chhak lama awm, Vanchengte kham hnuaiah hliam na tak tuarin hmuh a ni a. Serchhip police ten Vancheng khaw mi tlawmngaite puihna lak chhuah a nih hnu ah, enkawlna ṭha tak a dawn theih nan vawiin khan Civil Hospital, Aizawl panpui a ni.

Lalnunema hi a ṭhianpa Lalchhanhima nen June ni 7 khan AK 47 silai tam tham tak nen man an ni a. An tlan chhuah hnu ah nimin tlai khan Vancheng daiah hian hmuh a ni a, chaw an eitir laia a tlanchhia chu lengkira khamah tlan liamin, a ke veilam ruh a khup velah a sawh tliak a, a ha hmai a sawh nghin bakah, a lu ah hliam a awm bawk.

An hmuh tirhah chuan a lo chau hle a, nachhawkna leh damdawi dang te nen uluk taka enkawl a nih hnuah a lo harh ṭha leh a. A ṭhianpa, a tlanchhuahpui Lalchhanhima (41) s/o Zabiaka Leisen Myanmar erawh hmuh a la ni lova, ngawrh taka la zawn mek zel a ni.