June 3, 2022; Tripura, Jampui tlangdung a cheng Zofate chuan Mizoram sawrkarin 'Hnam Impumkhatna Bus Service' (Aizawl leh Behliangchhip Inter-state service) a tihlawhtling chu an tan chuan malsawmna a nih thu leh, a hming putchhan ang a ' inpumkhatna' thlentu a nih ngei an rin thu an sawi.

Behliangchhip VCP Lalhnehzela'n ZALEN a hrilh danin, May ni 9, 2022 a Chief minister Zoramthangan bus service hmasa ber a vailiam atangin, hun ruahman sa ang zelah bus a la tlan thei zel a, fur ruahtui te a tlak chhoh avangin zin veivak (passenger) erawh tam thei rih lo mah se, bungraw hrang hrang inthawnna atan te tangkai taka hman tel mek a ni.

Tripura Zofate chuan Mizoram sawrkarin a hming atan a hnam inpumkhatna bus a vuah chu inhmeh an ti hle tih thudawnna chuan sawiin, hnamdangin engtinnge an lo ngaih tih erawh an sawi thei loh laiin, state pawn a awmte tan malsawmna a nih thu te, inpumkhatna thlentu a nih ngei pawh an rin thu a sawi.

"Kan beisei ruk, kan beisei tak tak ngam loh a ni a, Mizoram sawrkar hnenah pawh kan lo ngen tawh thin a, sawrkarin min hriatsak reng a, keimahni lam zawkin kan lo theihnghilh hman tep tawh zawk laiin, Tripura lam sawrkar hruaitute nen inbepawp a Jampui ang mai nilo, hnam anga remruatna sawrkarin a siam hi kan lawm takzet, Mizo Convention leh YMA angte pawhin tun thlengin Mizoram sawrkar chungah lawmthu kan la sawi tawp hlei thei lo," Behliangchhip VCP chuan a ti bawk.

Aizawl leh Behliangchhip inkar a tlan, MST bus service hi chuan man passenger pakhat ah Rs. 476 a ni a. Thawhtanni leh Ningani zing dar 6 ah Aizawl atanga chhuak a, Thawhlehni leh Zirtawpni zing dar 6 ah Behliangchhip atangin a chhuak thin. MST bus service vang hian sumo service a chuan man passenger pakhat a Rs.1,000 ni thin pawh Rs. 800 ah a tlakhniam phah tawh nia hriat a ni.