Ningani chawhnua Jammu & Kashmir-a sipai lambunna thleng chhuina kal zelah mi 12 vel hren an ni tawh a, ngawrh taka chhui zui mek zel a ni.

Poonch district-a Bata Doriya ramngaw chhah taka inlambunna thlenga a titute um zuinaah hian MI helicopter, drone leh uisathiam te nen thawh chhuah a ni.

Thuneitute chuan mi an man tawhte hi thu an zawt fiah mek a, an pawl hi eng nge an nih chiah hriat tum niin heng lai velah hian kum khat chuang an lo khawsa tawh nia ngaih an ni a, ralsai thiam pawh an nei nia hriat a ni.

Jammu & Kashmir Director General of Police Dilbag Singh leh Additional Director General Mukesh Singh te pawhin thil thlenna bul, Rajouri district-ah awmhmun an khuar.

Deputy Inspector General rank-in a ho National Investigation Agency (NIA) team pawhin awmchilhin agency hian he thil hi an lak zui rin a ni.

Hriat theih chinah mi firfiak pangain army truck chu hmun thum atangin an kah rawn a. An kah hnuah lirthei tihchhiat nan grenade leh bomb pawh an hmang nia hriat a ni.

Sipai lambunna thleng avang hian Bhimber Gali leh Jarran Wali Gali inkar kawngpui chu lirthei zawh theih loh tura khar rih a ni.

Rajouri leh Poonch-a thuneitute chuan a beitute hi heng lai vela kum khat chuang lo khawsa tawh, ram thleng leh khawkrawk dan hre chiang an ni tih an sawi.

Heng lai hmun hi Jammu & Kashmir Gaznavi Force (JKGF) inkulhna niin an commander, Rafiq Nayi tia hriat, Rafiq Ahmed-a pawh a cheng.

Rajouri leh Poonch-ah hian firfiak pawl pathum vel an la awm nia hriat a ni bawk.

Ningani chawhnua sipai beitu-ah hian Jaish-e-Mohammed nena inzawmna nei, People’s Anti-Fascist Front (PAFF) chu an inchhal a. Hetih lai hian an chet danah Lashker-e-Taiba hnuhma a ang nia sawi a ni bawk.

Ramngaw chhah tak, Tota-Gali-Bata Doriya vel zawng zawng chu khar a ni mek.

Thuneitute chuan drone leh uisathiam thawh chhuahpuiin a titute chhui hna thawh a ni a, MI-chopper hmangin vansang atangin vil a ni bawk tih an sawi.

Nun hlantu sipaite zahna hlan

Jammu & Kashmir-a sipai lambunna thlengah hian panga an thih bakah pakhat hliam na tak tuar a awm a. An lirthei chu kah chilh a nih hnuah a kang a. Heng sipaite hi Rashtriya Rifles unit-a mi niin mi firfiakte bei tura dah an ni.

Zirtawpni khan army leh police thuneitu sangte chuan sipai thi - Havildar Mandeep Singh, Chankoian, Ludhiana (Punjab); Lance Naik Kulwant Singh, Charik, Moga district (Punjab); Sepoy Harkrishan Singh, Talwandi, Gurdaspur district (Punjab) leh Sepoy Sewak Singh, Bagha, Bathinda district (Punjab) te ruang chungah zahna pangpar dahin an thlah.

An ruang hi an khua theuhva an chhungte hnenah thawn an ni nghal bawk.

Army chuan, “Chief of Army Staff General Manoj Pande leh Indian Army-a mite zawng zawngin Indian Army huaisen panga, nimina Poonch sector-a ram tana nun hlantu - Hav Mandeep Singh, L/Nk Debashish Baswal, L/Nk Kulwant Singh, Sep Harkrishan Singh leh Sep Sewak Singh te chu zahna a hlan a ni,” tiin Twitter-ah a tar lang.

Jammu & Kashmir Lt Governor Manoj Sinha pawhin sipai huaisenten nunna an chân chu pawi a tih thu a sawi a. “Ram tana an thawh hi theihnghilh a ni dawn lo va, an kalsan tak an chhungte pawh kan hre reng a ni,” a ti.