A hmuhnawmin a ngaihnawm dawn khawp mai, chutihrualin JB-a pawh a ngaihawm tel dawn! Jeremi Zobiaka tribute concert atan inbuatsaihna a kal zel a, hranghlui musician intel khawmin side band an din hmiah a, a hming pawh 'Deep Mondal' band an ti! He Deep Mondal band-ah hian Tribal Power frontman OP-a bakah James D Ralte, Lalduhawma Hnamte leh Giddy te an tel a, anni hian RollingStone leh Jumping Jack Flash hlate bakah JB-a hla te an play ang. Anni bakah Makuka band-ah pawh Evenflow atangin Ma-ngheta a tel thar ve leh ta bawk. Tunlai zaithiam lar leh band lar te pawh an inlan nual dawn a, tunkar chhoah tute nge an nih a chiang thei tawh ang. Light and sound a pui dawn khawp mai a, Mizorama light leh sound lama buaipuitu lian pathum, he’ng — Active, Makuka leh Ocean Sound te an thawkho dawn a, hei hi concert ti nghahhlelhawm tu pakhat a tling hial awm e. He tribute concert hi April ni 12 zan dar 7:00 hian Vanapa Hall-ah neih tur a ni a, JB-a hla te chu zaithiam leh band hrang hrang ten an perform dawn a, concert organiser-te chuan "He zan hi chu a rock and roll viau ang," tiin an sawi. Rock and roll lohna pawh a rei ta viau! Chutiang hun i hmang chak a nih chuan, JB-a Tribute Concert-ah kal a tihchi viau ang.