Israel khawpui, Jerusalem-a buaina nasa tak chhuakah Palestinian 163 leh Israeli police officer parukin hliam an tuar niin Palestinian damdawi in leh Israeli police chuan an sawi.

Hliam tuar tam ber hi Al-Aqsa Mosque-a buaina chhuaka mite niin Israeli police-in thelret silaimu leh stun grenade hmanga an kah laiin Palestinian-te hian lung leh um ruakin an vawm ve thung.

Ram luahtu Judaten Palestinian awm vete hnawh bo an tum tih thawm a awm mek avangin boruak a tang hle.

Red Crescent chuan buaina chhuahna hmunah hian damdawi in hawngin hliam tuarte an enkawl.

Jerusalem khawpui hlui zawka Al-Aqsa mosque hi Islam sakhaw zuitute hmun pawimawh ber pakhat a ni a, hetih rual hian Judaism tan an hmun thianghlim, Temple Mount awmna a ni bawk.

Zirtawpni zan khan kar hmasa Zirtawpni zana Muslim thla thianghlim, Ramadan hmangtute pun khawm tihel nan Juda tam tak an pung khawm ve a ni.

Israeli police-te chuan inkhawm sang tam takten tlai tawngtai an hman zawhah buaina an siam avangin boruak thunun tuma tharum an hman thu an sawi.
 

Palestinian President Mahmoud Abbas erawh chuan Israel chuan hetiang thil thlengah hian mawh a phurin sual takin a che niin a sawi.

Reuters news agency chuan Aqsa-a thuneitute chuan aurinna hmangin inbengdai turin a ti a. “Police-in inkhawmte stun grenade-a an kah titawp sela, thalaite pawh insum rawh u!” tiin an au nasa niin a hmuna awmten an sawi tih a tar lang.

Palestinian Red Crescent emergency service chuan Palestinian hliam tuar 88 chu damdawi inah lak an nih thu leh thelreta tuam silaimua kah an ni tih an sawi a. Police pawhin an zinga hliam tuar paruk chu damdawi in kalpui ngai an nih thu an sawi ve bawk.